Shillong, Lber 10: Ki nongialam ka Hynñiewtrep Youths’ Development Council (HYDC) Mynta ka sngi ki la wan ban pynpaw ia ka jingsngewpyrshah halor ka jingthmu ka sorkar ban rah ia ka winter capital sha Tura, da kaba kynnoh ba kane ka jingthmu ka Sorkar kan wanrah ka jingktah ka bajur ia ki paid Khasi Jaintia.
Ïa kane la pyntip da u General Secretary ka seng u bah Shaniah Suchen ha ka jingiakynduh bad ki ladpathai khubor ha Shillong Press Club.
U la ong ba kumba long mynta ka jylla Meghalaya ka don ha tmir ka jingma, da kaba u la ong ba, naduh ka ram ka shah, ka pule puthi, ki jaka ai jingsumar kim biang satia. Lada ka sorkar kan rah noh ia ka winters capital sha Tura ka jinglud jingsep kan long da ki hajar klur, nalor ba ka jylla Meghalaya ka long kaba rit, mynta ka sorkar ka don ruh ka ram kaba kot sha ka 22 hajar klur.
U bah Shaniah Suchen u la ong ba lada kane ka jingthmu kan urlong lehse da ki phew hajar ha ka shi bnai ngin hap ban siew ia ka ram. U la ong hoi ki pait Garo ki kwah ia ka roi ka par, kim tip pat kaei ka ban jia pat sha lyndet.
U la pynpaw ba ka seng ka dap da ka jingsngewsih ban iohi ba ki MLA khasi jongngi ymdon ki ban pyrshah halor kane ka jingthmu jong ki MLA Garo ban rah ia ka nongbah sha Tura.
“Hoid ymlah ban len ba ha Tura la dep shna ia ka mini secretariat kumjuh ka ingsah jong u Governor, kane ka la dei ka jingiasubuit sop sop jong ki pait Garo naduh ki nongmihkhmat, ki sengbhalang jongki” u la ong.
U bah Suchen u la ong, Ha Khasi-Jaintia ngi dawa tang kawei ka Shillong Medical college ban shna hapoh Shillong ka sorkar ka ong ba kam don pisa, kumno ban rah ia ka nongbah na Shillong sha Tura ka sorkar kan don pisa.
U bah Shaniah Suchen u la buh ka jingkyrpad ia ki sengbhalang kiba ha khasi jaintia ban iatylli kawei ba dalei lei ymdei ban ailad ban rah ia ka roi ka par na nangbah Shillong sha nongbah Tura, namar kan long ka jingduhnong kaba khraw ia ngi.
