Shillong, Nailur 26: Mynta ka sngi ka Joint Action Committee (JAC) ka Synjuk ki rangah shnong, lai tylli ki seng bhalang, kaba kynthup ia ka KSU, ka FKJGP bad ka HNYF, kila ia kynduh ia u symbut myntri rangbah ka jylla u bah Prestone Tynsong halor ka jingujor jong ki paidbah ka thain Umsing halor ka jingpynbna ba ia ka Umsning Division jong ka MeECL ban aiti noh sha ki kompeni.
U bah Ferdinand Kharkamni shongknor ka JAC la ong ba ha dien ba kila iohi ia katei ka jingpynbna jong ka MeECL kila ia kynduh ha ka 10 tarik mynta u bnai ha Umsning bad ha katei ka jingialang kila shim rai ban ia kynduh ia u bah Prestone myntri ba dei peit ia ka tnad bor ding ban pynpaw ia ka jingpyrshah.
Ha kane ka jingiakynduh mynta ka sngi la kren shai na ka liang jong ka JAC kala pynpaw ba khlem ka jingpynshai paidbah ha ki shnong ki thaw ym dei ban aiti sha ki riew shimet ia ka Umsning Sub Division, ka JAC ka pynpaw ruh ia ki jingeh ia kaei kaba la jia ha Mawkyrwat bad Mawsynram bad kum juh sha Garo Hills.
Ka jingeh ka long ka jinglip light khah khah, ka jingmut ban aiti sha ki kompeni ka long ba kan dan pynbha ia ka jingaibor ding hynrei ka dang long hi kum juh bad ia kaei kaba la jia ha Dadengre lei ka dang kham sniew shuh shuh ia kaba mynshuwa.
Ha kane ka jingiakren, la sngewthuh ba ka jingaiti kan long naduh ki sub station, haduh ka bor ding, ka jingsam ia ka bai light sha ki kompeni ka long kaba eh namar ka dang don ka jaka sam bor ding tang kaba 11 KV, kam pat poi haduh katta ba ki nongpyndon kam light ban pynbiang ia kaba thikna namar ha ka por slap haba jur ka lyer ki ksainar ki dkut noh.
Ha kane ka jingiakynduh mynta ka sngi ia u bah Prestone kila ong ba dei ban pynbha shuwa ia kine ki Sub Station bad pynkiew ia sha ka 11 KV haduh ka 32 KV, kum juh ia ki smart meter don kam ban pynshai paidbah shuwa ia ki nongshong ba kin sngewthuh bad kiei ki jingmyntoi bad kiei ki jingduh jingmyntoi.
Ha dien kata lada ki paidbah ki shim ba kane ka biang ka jingtrei kam ka shnong hi ha ki paidbah, kaei kaba ki ieng mynta ka long ha dien ba ki paidbah ki ud ki nam ban aiti noh ia kane ka Umsning Sub Division sha ki kompnei shimet ki pyrshah.
Ha kane ka jingiakynduh mynta ka sngi la ong ba ka jingkular haduh mynta la pynsangeh shuwa bad ynsa pyntrei haduh ban da dep ia kane ka jingpynshai paidbah, ha dien kata kin sa bud dien bad lada ki hun ba lada ki paidbah ki hun ki ruh ki pdiang.
Ka daw kaba u myntri ba dei peit ia ka tnad bor ding u bah Prestone Tynsong symbut myntri rangbah ka jylla la ong ba ka jinglum ia ka bai light ka lah ban long T.1.5 klur lane T.1 klur, hynrei la iathuh ba ka jingioh ka duna ia kata, hynrei ka jingshem jong ki ka long ba kim juh don kata ka jingbymsiew ia ka bai light.
Haba peit ia ka jingkhein kaba buneh dei ha Garo Hills bym siew ia ka bai light, lada ia ki jaka ba ki paidbah ki siew thikna balei yn aiti sha ki riew shimet, kane kan long kaba eh ban ia treilang bad ki kompnei ba wan na bar ka jylla
