Shillong, Iaiong 27: Mynta ka sngi ka kynhun Shillong Citizens Forum kala pynlong ia ka jingthang mombati ha Khyndailad ban pynrem ia ki lehnoh na Pakistan kiba la siat iap ia ki riew paidbah ha Pahalgam ha Jammu bad Kashmir ha ba bun ki riew lui luit kila khlad bad bun kila mynsaw.
Ha kane ka sngi da ki bun spah ngut ki nongshong shnong kane ka nongbah Shillong na baroh ki jaidbynriew kila wan ban ia shim bynta ha kane ka jingthang Mombati, kum ka dak ban pynrem ia ka jingjia ha Pahalgam bad ha ka juh ka por ban phah ia ka jingsngewlem sha kiba ha iing ha sem jong kiba la khlad noh bad ban kit bok ia kiba mynsaw kin khlain noh.
Katba ka jingthang Mombati ka dang iaid, ki paidbah kila wan ban ia shim bynta kila pynlong ia ka jingiapyrta pyrshah ia ka ri Pakistan bad ki da rah ruh ia ki jingthoh ban pynrem ia katei ka jingjia bad kyntu ia ka sorkar pdeng ba pynshitom tyngeh ia kiba don kti ha kane ka kam sniew.
Ha kane ka sngi la ioh ia ki jingkren na baroh ki kynhun jaidbynriew, hala ki jong ki jong ki ktien ban pynrem ia katei ka jingjia, la ioh ia ka jingkren ha ka ktien Hindi, Khasi, Garo nalor kine la don ruh kiwei ki jaidktien kiba la kren ban pynrem ia ka ri Pakistan.
