Shillong, Nailur 04: Ka jingialang jong ka Congress Legislature Party (CLP) kaba la long mynta ka meit ha iing sah jong u nongialam ka liang pyrshah u Dr Mukul Sangma kila shim ia ka rai ban pynieng ia u Winnerson D Sangma MLA jong ka Salmanpara ban long u kyrtong jong ka party ban ia khun ia ka ilekshon speaker.
Haba kren ha u SP News Agnecy, u wei na ki MLA u la iathuh ba ka jingialang jongka CLP kaba la long mynta ka sngi kala rai ban pynieng ia u Winnerson D Sangma kum u kyrtong ha kane ka ilekshon speaker ka ban long ha kane ka dorbar synrai.
Lah ban pynkynmaw ba u nongialam jong ka CLP u Dr Mukul Sangma mynnin ka sngi u la dep ong ba ka Congress kan pynbna ia u kyrtong ban ia khun ia ka shuki speaker ha dien ba ka kynhun MDA kan pynbna mynta ka sngi.
Na ka liang jong ka MDA mynta ka sngi kala pynbna ia ka kyrteng jong u Bah Metbah Lyngdoh ban long u kyrtong na ka liang jong ka sorkar. Ha kane ka iing dorbar kaba 59 ngut ka liang pyrshah ka don 19 ngut ki MLA kiba dei jong ka seng Congress bad ha ka liang synshar ki don 40 ngut kum ka MDA.
