Shillong, Kyllalyngkot 11: Ka General executive Council jong ka Khasi student Union kaba la long mynta ka sngi kala ia their bha halor ki lai tylli ki mat, kita ki long halor ka Citizenship Amendment Act 2019, ka Inner Line Permit bad ka kam pynbeit pud bad ka jylla Assam.
Haba kren ha ki lad pathai khubor ha dien ka jingialang kaba la neh da ki kyntu, u president jong ka KSU u samla Lambokstarwell Marngar u la ong ba na ka liang jong ka KSU ka iengskhem ban pyrshah ia ka CAA bad kin dang leit ban pynlong ia ki jingialang paidbah ban pynshai halor kane.
Haba ia dei bad ka jingdawa ia ka Inner Line Permit, ka ong katba dang ap ia ka ILP ka sorkar jylla ka dei ban pyntrei kam noh ia ka ain MRSSA 2016. Haba ia dei bad ka ILP ka seng kan dang leit ban pynshai paidbah kylleng, ha ka 16 tarik mynta u bnai kin pynlong ha Mawsynram bad 18 tarik ha Nongstoin ha kaba ia dei bad ka CAA.
U President jong ka KSU u la ong ba lada ka sorkar ka slem ban pyntrei kam ia ka MRSSA ka seng kan leit ban buh hi ia ki khyrdop ban talasi ia ki mynder kiba wan sha kane ka jylla. La ioh ia ka jingma ba wat ki shipai BSF ruh ki dang shah pynmynsaw ha ki bar ri.
Haba ia dei bad u pud u sam bad ka jylla Assam na ka liang jong ka KSU ka kyntu ia ka sorkar ba ka dei ban shim khia ia kane namar la iohi ba bun ki jingiakren kala iaid hynrei kam shym la poi sha kaba thmu . Lada ka sorkar kam leh ei ei haba ia dei bad u pud u sam kum ka seng kin hap ban leit sha u paidbah.
