Shillong, Nailar 24: Namar ka sorkar Assam kala pynkiew ia ka khajna jong ka Petrol bad Diesel ka kabinet ka sorkar Meghalaya ruh mynta ka sngi kala shim ia ka rai ban pynkiew ia ka khajna jong ka Petrol da shityngka bad kumjuh ruh ia ka Diesel.
U mytnri ba dei peit ia ka tnad ka koit ka khiah u James K Sangma haba kren ha ki lat pathai khubor ha dien bala wai ka kabinet la iathuh ba ka khahna ia ka petrol mynshuwa ka long 12.5 % bad mynta la pynkiew sha ka 13.5% kumjuh ruh ia ka Diesel na ka 4% sha ka 5%.
Da kane ka jingpynkiew dor ia ka khajna u myntri ka tnad ka koit ka khiah u la iathuh ba mynta ka Petrol ha Byrnihat kan long T.95.10 tyngka katba ha Shillong kan long noh 96.83 tyngka, ia ka Diesel pat ha Byrnihat kan long 83.50 tyngka katba ha Shillong pat kan long 84.05 Tyngka.
Kiwei ki rai kiba la shim ha kane ka jingialang ka kabinet ka long ba la pyndam noh ia ka The Meghalaya Street Vendors (Protection of Livelihood and Regulation of Street Vending) Act, 2014 bad ban pdiang noh da ka ain jong ka sorkar pdeng ban pynbeit ia ki nongdie madan ha Meghalaya.
Namar ka sorkar kala pdiang ia ka jingpynbna sorkar ban seng ia ka National Law School University, ka kabinet kala shim ia ka rai ban wanrah noh da ka Bill ha ka dorbar synrai ka ban sdang ha 9 tarik Nailur bnai ban wan.
Ka Kabinet kala pdiang ruh ia ka kaiphot National Judicial Commission jong ka sorkar pdeng kaba la pdiang ha u snem 2017, ia kane ka juh ka commission ka kabinet kala pdiang ban pyntrei kam ha kaba ia dei bad ka jingsiew ia kiba trei ha ki iing bishar.
Ka kabinet mynta ka sngi kala pdiang ia ka jingpynkylla ia ka Meghalaya Education Research Training Service Rule 2012 na ka bynta ban pynkylla ia ka rukom ithuh ia ki nonghikai ha ki skul sorkar.
