Shillong, Nohprah 20: U bah Prestone Tynsong Deputy Chief Minister jong ka jylla u la ong ba ka kabinet kaba la long mynta ka sngi kala shim ia ka rai ban pynkylla ia ka Meghalaya Buidling and Others Construction Workers Rule 2008 na ka bynta ka jingmyntoi jong ki nongbylla sngi.
Da kaba wanrah ia kane ka jingpynkylla u kpa ruh u la lah ban shim shuti ha ka por ba ka lok ka ioh khun. Ha kaba ia dei bad ka ram kaba ki ai ban thied ia kit air mistry T.5000/- tyngka ka kabinet kala rai ba kane kan long noh ka kran.
Ha ka juh ka por ka kabinet kala rai ban siew baibam ia ki mistry kiba trei ha ki kam tei ing teisem na ka bynta kiba pass degree kin ioh T.800/- kiba la pass deploma haduh kiba la pass ia ka klas XII kin ioh T.600 /- tyngka bad kiba pass klass V haduh klass VII kin ioh T.400/- tyngka man u bnai.
Nalor kata ka kabinet kala rai ruh ban ai jingiarap ia ka bai kot na ka bynta ki khun jong ki nongtrei mistry Class I haduh Class II T.400/- tyngka marwei, Klass III haduh klass IV kin ioh T.600/- tyngka marwei, klass V haduh klass VII kin ioh T.800/- marwei kiba pule klass VIII haduh klass X kin ioh T.1000/- marwei bad ia kiba pule Class XI bad ha ki Diploma kin ioh T.1200/- .
Ha kane ka sngi ka kabinet kala rai ruh ban pynkiew ia ka bai trei sngi, ia kiba dang sdang trei kan long T.300/- ia kiba la sdang nang kan T.340/- kiba la nang kan long T.380/- bad kiba la tbit bha kin ioh T.420/- bad kane kan trei kam naduh ka 01st Risaw 2018.
U symbut myntri rangbah ka jylla u la iathuh ba haduh mynta kiba trei bylla kiba la ai kyrteng hadoh jong ka tnad Labour jong ka sorkar ha ka jylla baroh kawei ki long 43,000 ngut. U myntri la ong ba ia kane ka pisa kaba kin siew sha ki nongtrei bylla ka wan na kaba ki shim ia ki nongpyntrei iing pyntrei sem kaba 1%.
Ka kabinet kala pdiang ruh ia ka jingkwah jong ka tnad labour ban wanrah ia ka jingpynkylla ha ka Meghalaya Buidling Welfare Bill 1996 bad la bethah ia ka tnad labour ba kan wanrah noh ia kane ka bynta ha ka dir jong ka Ordinance laleh ia kane ka long ban pynlong ia ka sorkar ba kan dup lah ban thaw ia ka board ia kaba yn tip kum ka Meghalaya Building and Others Construction Works Board ia kaba yn khlieh da u Principal secretary jong ka department la leh ia kane katkum ka jingbethah ka iing bishar ba ha khlieh duh jong ka Ri ka Supreme Court, la ong u Bah Prestone.
