Shillong Jymmang 10:Ka Khasi Hills Autonomous District Council (KHADC) mynta ka sngi ka la rai ban pynduh noh ia ka jingot kilo ia kino kino ki Marrrep ha Iewduh.
Ia kane ka Rai la shim ha ka Jingialang ba long hapdeng ki nongialam jong ka District Council ha ryngkat ka jingdonlang u Syiem ka hima Mylliem, ki nongialam jong ka Hills Farmer Union (HFU), bad ki nongkhaii.
U Chief Executive Member (CEM) ka KHADC u bah Titosstarwell Chyne haba kren sha ki lad pathai khubor, u la ong ba ka Council ka la rai ba ym dei shuh ban don ka jingot kilo ia ki marrep bad dei ban bud ryntih ia ka hukum ba la ai da ka Hima Mylliem ha u snem 2019.
Ha kane ka jingialang, ngi la shim ia kawei ka rai kata ka long ba naduh mynta ym dei ban don kano kano ka jingot kilo ha Iewduh bad dei ban bud ryntih ia ka hukum ba la ai da ka Hima Mylliem kaba la kdew ‘ Ka Dobar u Acting Syiem ka Hima Mylliem ka la rai ban iai pynbna kumba ju leh man u snem.
Ban pynkynmaw ba ia ki marrep ba wanrah da ki nongrep ban die ha Iewduh ne ha kino kino ki iew ba hap ha Hima Mylliem, ki nongthied kidei ban da thew biang ia ki Khoh ki byrni bad ki Kriah ba la pynthylli hadien ba la pyllait ne theh ia u marrep khnang ban tip katno ka khoh ka byrni ka khriah ka khia bad sa khate.
U CEM u bah Titoss u la ong ba ka kyntien ot kilo kam dei ban mih shuh hynrei dei ban shim ba la kyntait ia u marrep ba pyut. Hynrei lada don ki nongrep ba dang pdiang ia ka jingot kilo kata kan shong ha ki, hynrei na ka liang jong ka Council kan nym don shuh ka jingkitkhlieh ia kito ba pdiang.
Ka KHADC ka la rai ruh ba kan pynmih ia ka Notification kaba long kum kajuh ka hukum jong ka Hima Mylliem bad kane kan treikam ia baroh ki iew kiba don hapoh u pud u sam jong ka District Council khnang ba kan nym don shuh ka jingot kilo ha kino kino ki Iew.
Khnang ban lah ban peit ia kine ki jingeh, ka Council ka la rai ban don ia ka Special Committee bad ia kane yn khlieh da u CEM ryngkat ki EM, ka HFU, ki nongkhaii bad ki khlieh Nongsynshar kynthup ki Syiem bad ki Sardar ban iakren iatai ia ka jingeh ki Nongrep ha baroh ka District.
Ka Rai ba khatduh ba ka Council ka la shim ka long, ba ka EC ka la wanrah ia kawei ka Bill ka 2nd Amendment Bill kaba dei ia ka Khasi Hills Autonomous District Establishment Management and Control of Market.
Kane kadei ka 2nd Amendment Bill, kaba ngi la wanrah lyngba kane ka Bill bad ha kane ka la don ki kyndon ba la mana tyngeh haba iadei bad ka jingot kilo. Hadien ba ladep pynbiang kin sa leit ban iakynduh ia ka sorkar jylla ba kan pynsted khnang ban ioh noh ia ka jingmynjur na u Lat ka jylla, ong u CEM.
