Shillong Naiwieng 15: U President ka Ka Hills State Peoples Democratic Party (HSPDP) la iathuh ba ha ka jingialang jong ka party mynta ka sngi kala shim ia ka rai ba kan long noh ka dkhot bad ha ka National Federation of New States (NFNS).
Haba kren ha ki lat pathai khubor u bah PK Pangiang u la ong ba ka NFNS ka dei ka Synjuk kaba kdup ia baroh ki nondawa jylla ba thymmai ha Ri India bad ka HSPDP ka la rai ban long ka dkhot ba pura hapoh ka NFNS.
La iathuh ba hapoh kane ka NFNS ki don bun ki jaidbynriew kiba ia dawa ia la ka jong ka jylla ha la ka jong ka ktien ka thylliej jong ka jaidbynriew. Na Khasi Jaintia, ka don ka party HSPDP kaba dawa ia ka jylla Khasi-Jaintia States.
Na kiwei ki jylla ka thain shatei lam mih ngi ka Ri India ki don kum ka Bodoland, Tripaland, Karbi Anglong, bad kiwei de kiba dawa la ka jong ka jylla. Ka rai ban don ha kane ka NFNS ka long ban ia ieng tylli kawei ban dawa ban kyrshan lang iwei iawei ban pynsngew ia ka skhor jong ki nongialam ha Parliament.
U President ka HSPDP, u la ong ba ha shwa ban don ka jing iakynduh lang ha Delhi ha u bnai Nohprah, 2022 na bynta kiba dawa ia ka jylla ba thymmai, kan don shwa ka jingiakynduh lang jong ka HSPDP bad ki nongialam jong kiwei ki jaidbynriew kiba dawa ia ka jylla thymmai.
La iathuh ba ha ka 30 tarik mynta u bnai kan don ka jingiakynduh ha Mawphanlur ha West Khasi Hills District. Ha kane ka sngi yn yn wan u Joint Secretary ka NFNS u Stalin na Karbi Anglong, u Co Chairman u Nikman Marak na Garo Hills bad kiwei ki nongialam na ka Thain lammihngi ban ia kren.
Ha katei ka sngi, yn sa iatai bha bad kin sa shim ia ka rai ba kin rah ia ka jingdawa ha ka sorkar India.Ha kane ka jingialang, ka HSPDP ka la iathir ruh halor kumno ban pynbha ia ka Manifesto ka party bad bun ki bynta kin dei ki juh bad don katto katne tylli kaba kin sa pynbha bad ia kane la aiti ha u President, General Secretary bad ha ka State Election Committee ka party ha kaba shen kan sa pyllait ha shwa ban leit sha ka ilekshon.
