Shillong, Nailur 21: U Myntri Rangbah ka jylla mynta ka sngi u la iathuh ba ka sorkar ka jingialang jong ka kommittee pyrkhat kam kaba mynta ka sngi la shim ia ka rai ba yn sdang ban plie noh ia ki khatar tylli ki “Industrial Training Institute” ha ka jylla la sngi Palei ha ryngkat ki kyndon kiba ka sorkar kala buh.
U Myntri Rangbah u la ong ba ha kane ka jingialang kaba la long mynta ka sngi kila ia kren ha kaba ia dei bad ka jinglong jingman jong kane ka khlam COVID-19 ha kane ka jylla baroh kawei, la ka long ha ka jingkiew kiba shito, kiba la koit, bad ka jingkiew ha ka jingiap.
Ha kane ka jingialang la ia kren ruh kumno ban iada na ka jingsaphriang ia kane ka jingpang khlam ha kaba kala don ka jingkiew ha ki katto katne ki jaka bad ka sorkar ka pyrkhat ruh kumno ban dang kham pynsngewthuh shuh shuh ia ki briew ha kaba ia dei bad kane ka jingpang COVID-19.
U Myntri Rangbah u la kren shai ba ka jingkhang dom kam dei ka lat jingiada hynrei ka shu long tang kawei na ki lat ban pynslem ia ka jingsaphriang ia kane ka jingpang COVID-19 ka jingkhang dam kam dei ka jubab ia ki jingeh.
Ka sorkar kam shym la pyrkhang ban khangdam, hynrei kan don ka jingkhang ha ki katto kane ki jaka ban khang dam lada don kam, namar ka jingkhang dam ka ktah ia ka ioh ka kot jong ki briew, dei na kane ka daw ba hap ban ia iaid lang ryngkat ryngkat ka jinghusiar namar kane ka jingpang khalm COVID-19 kan dang neh.
Halor ka jingsaphriang ha ki Social media ba kan dang ka jingkhangdam, u myntri rangbah u la ong ba ka khubor kaba la sphriang ka long kaba bakla bad ka bym dei ia kaba ka sorkar kala dep ban pynshai ka kam don kata ka jingkhang dam.
Haba ia dei bad ka jingdawa ka BJP halor ki jingkynnoh ba ka la don ka jingbamsap ha GHADC bad ka JHADC, la ong ba ka sorkar kam shym la shong kli kti ha kaba ai dei bad kane kan sorkar kan sa shim ia ka rai ha ka por kaba biang, halor ka jingdawa ban phah tohkit sha ka CBI ia kane kin sa iapeit la ong u Cornad K Sangma.
