Shillong, Rymphang 16: U Myntri Rangbah ka jylla u Conrad K Sangma mar ia wan poi na Arunahcal Pradesh u la khot ia ka jingialang ba kyrkhieh jong ka kynhun myntri ban ia kren ha kaba ia dei bad ka jingiakhih ki nongniah kali kamai halor ka nongrim ba la kiew palat ka dor petrol bad Diesel.
U Myntri Rangbah ka jylla u Cornad K Sangma haba kren ha ki lat pathai khubor ha dien ka jingialang ka kynhun myntri, la ong ba ka sorkar kala shim ia ka rai ban pynhiar ia ka khajna na ka VAT da T.5 /- shilitter ia ka petrol bad ia ka Diesel, kane ka long nalor ba ka sorkar kala dep ban pynhiar mynshuwa da T.2/- tyngka.
“Da kane ka jingpynhiar dor biang sa T.5/- tyngka ha ka shilitter ia ka petrol bad ia ka Diesel na ka VAT, ka dor petrol ha Shillong kaba long T.91.26/- tyngka kan poi noh sha ka T.85.86/- tyngka ei ei ha ka shilitter bad ka Diesel na ka T.84.23/- tyngka kan long noh tang T. 79.13 tyngka”. La ong u Conrad.
Da kane ka jingpynhiar ia ka khajna na ka VAT sa T.5/- tyngka mynta ka sngi ka sorkar kan duh da T.20 klur ha ka shibnai, la ong ba mynshuwa ka VAT ia ka petrol ka long T.31.62 tyngka bad ia ka Diesel ka long da T.22.95/- tyngka.
U Myntri Rangbah ka jylla haba ai ia ka jingkhein u la ong ba lada khein lang ia ka T.2 /- tyngka kaba la pynhiar mynshuwa bad ka T.5/- kaba la shim rai mynta ka sngi ka khajna kaba la pynhiar na ka VAT ka long T.7 /- tyngka shilitter, da kane ka jingpynhiar ia ka VAT, kan iarap ia ki nongbuh kali kamai bad kum juh ia ki riew shimet.
Haba shim ia ka jingkhein kaba la ioh lum na ka khajna na ka Petrol bad Diesel lyngba ka VAT ha u snem mang tyngka 2019-2020 ka sorkar kala iohlum T. 326/- klur katba ha kane ka snem mang tyngka kaba mynta haduh u bnai Kyllalyngkot 2021 la ioh lum haduh T.451/- klur bad kyrmen katban da kut kane ka snem mang tyngka kin kynjoh sha ka T.470/- klur.
Ha ka juh ka por u myntri rangbah ka jylla u la pynpaw ba ka sorkar kan hap ban dang wat ia ki lat ki lynti kumno ban dang ioh lum khajna na ki kam kiba thymmai ne ban pynkiew ia kiwei ki jait khajna kiba la juh don bad kane ka sorkar kan dang peit bniah.
