Rakhe ka AJYWO ia ka lyngkhuh sngi iap ban 157 jong u Kiangnangbah khlawait ka Ri Khasi

Jowai, Nohprah 30: Ka AJYWO Central Body hapoh ka jingialam u Bah M H Dkhar  kum u President lem bad ka AJYWO East Jaiñtia Zone hapoh ka ka jinglamkhmat u Bah Heatermoon Ryngkhlem kum u President lem bad kiwei ki nongialam jong ka seng, mynta ka sngi 30 tarik u Noprah, 2019, ka ba dei ka lyngkhuh sngi iap ba 157 snem jong u Kiang Nangbah, u Khlawait jong ka Ri Jaiñtia, da kaba shah sdien phasi ha ka sorkar Bilat kaba la synshar donbor ia ka Ri Jaiñtia ha kito ki por.

Ka seng, ka la kynmaw ieit tympang ia u tei u Nongialaeh-laitluid Bakhraw jong ka Ri Jaiñtia da kaba leit buh syntiew ha ryngkat ka duwai phirat ha u Motdur jong u Kiang Nangbah, ha Khliehriat, ia u ba  la tei da ka AJYWO Central Body ha ryngkat ba ka jingiatrei lang ba ka District Administration, East Jaintia Hills District, ha u snem, 2016 kum ka daw  ka ban pynsahnam bad kynmawieit ia utei u Khun Dapshynrang jong ka Ri Jaiñtia.

Ha kane ka jingkynmaw ieit bad jingkynmaw burom jong ka AJYWO, ia ka ka jingdap 157 snem ka jingshah sdien phasi jong u Kiang Nangbah ha ka Sorkar Phareng, U Bah M H Dkhar  u la kren lyngkot ha khmat jong utei u Motdur jong u Kiang Nangbah da kaba kynmaw tympang halor ki Kam Bakhraw bad Jinglen-lade jong u Kiangbah Nangbah, U Khun Dap Shynrang, ka Ri Jaiñtia na ka bynta ka Ri bad ka Jaibynriew, kat haduh ba u la pha ia la ka jong ka jingim na ka bynta ban pynlait luid ia ka Ri bad ka Jaibynriew na ka jingshah-tehmraw ha ka ka sorkar nongwei.

U Bah M H Dkhar, u la ong ruh, ba hooid, wat la ka Ri Jaiñtia ka la ioh ia ka jinglaitluid na ka kti ki Dohlieh, hynrei kat kumba ka long mynta, ka Ri Ri Jaiñtia, ka ia kynduh shibun ki jingeh ha kiwei pat ki bynta ki ba ktah ia ka Ri bad ka Jaidbynriew.

U tei u nongialam jong ka AJYWO, u la pynkut ia la ka jingkren lyngkot jong u, da kaba duwai bad kyrpad ia u Trai Kynrad Nongbuh Nongthaw ba un dang pynmih ia shibun ki Kiang Nangbah jong ka Jaidbynriew ha kine ki sngi ba mynta, ki ban ialeh bad len-lade na ka bynta ka hok, ka jinglaitluid, ka jingshongsuk bad ka roi ka par jong U Khun U Hajar jong ka Ri Ri Jaiñtia, bad ruh pynkut syndon ia katei ka jingkynmaw ieit da ka jingiabuh syntiew lang ha kjat jong utei u Motdur jong U Kiang Nangbah.