Shillong, Naitung 02: Ka Ramakrishna Mission Vivekananda Cultural Centre mynta ka sngi ka la sam ia ki certificate sha ki samla pule ka batch ba 95 bad 35 jong ka Computer Science bad Language ha ka prokram ba la pynlong ha Shillong.
La sam 1400 tylli ki certificate sha kine ki shah hikai na ki ar bynta ka jingpule. La pynlong ia ka convocation na ka bynta ki shah hikai jong ka batch kaba 95 kiba la iashim bynta ha ka session kaba long naduh u Jymmang haduh u Jylliew 2022 kaba don 1700 ngut ki samla na ki bynta bapher bapher jong ka thain shatei lammihngi.
Kito ki shah hikai kiba la leh kham bha ki long – Computer-Beginner Ishuah Kharsohtun, Intermediate – Karleven Odiniel Laloo; Tally -I – Sunny Deb Tally-II Banisha Kharbi; DTP- Nika Delecta Lyngdoh Nongbsap; We & PC Maintenance – Willingly Lamin; Database- Sophia Katrai; Cloud computing bad Python- Assunta Jala.
La pynlong ia kane ka convocation ha ki ar tylli ki bynta – kawei ha ka por mynstep bad sa kawei ha ka por nohphaisngi. U Regional Director, Atomic Minerals Directorate for Exploration & Research, NER Shillong u Dr. Prakhar Kumar, uba la wan iashim bynta ha kane ka convocation kum u kongsan u la ai jingiaroh ia kane ka jaka pule kaba la ai jingkikai ia ki samla ha ka IT bad u la ban jur halor ka jingtrei shitom bad ka jingpynneh jingmut na ka bynta ka roi ka par jong ka ri.
U kongsan jong ka bynta kaba ar, u Principal & Secretary Institute of Hotel Management Shillong, u Vijay Kumar u la kyntu ia ki samla ba kin pyndonkam ia la ki sap na ka bynta ka bha ka miat jong ki briew jong ka ri.
U Secretary, Ramakrishna Mission, Shillong, Swami Hitakamanandaji Maharaj u la kitbok kitrwiang ia ki samla pule bad u la kyntu ia ki ba kin pdiang ia ki jinghikai jong u Swami Vivekananda khnang ba kin ioh ia ka jingjop ha ka jingim jong ki.
U Deputy Centre-In-Charge, Brahmachari Vairagyachaitanya u la iaroh ia ki samla pule kiba la trei shitom bad u la kren ruh shaphang ka bynta jong ki nonghikai ha kane ka kam. U Swami Divyaswarupananda Maharaj, Centre-In-Charge u la ai ka jingkren pynkut.
Ka Ramakrishna Mission, Shillong ka ai jinghikai ia kumba 6000 ngut ki samla ha ka shi snem ha ki jingpule kiba iadei bad ki kor computer, ha 5 tylli ki session.
