Shillong, Kyllalyngkot 21: Mynta ka sngi ka jylla Meghalya kala rakhe ia ka jingdap 51 snem ka jylla, ha kane ka sngi u Lat ka jylla u Brig. (Dr.) B D Mishra (Retd.) u la sam ia ki khusnam sha ki 18 ngut ki nongtrei sorkar kiba la shah pynkup burom kiba la trei shitom ha ka kam kaba la pynkham ti ia ki ha ka jingdon lang u Chief Secretary ka jylla u bah D P Wahlang.
Haba kren ha kane ka sngi kum u kongsan la ai khublei kyrpang iaki paidbah ka jylla ha kane ka jingdap 51 snem ka jylla bad kane ka dei ka sngi ban sah kynmaw, dei ha kum kane ka sngi 51 snem mynshuwa ka myntri rangbah duh jong ka Ri India ka Indira Gandhi kala wan ban plie ia ka jylla ba pure ha kum kane ka sngi.
Ka jingiakhih ki paidbah ka jylla Meghalaya ban ioh iala ka jong ka jylla ka long kaba dei hok bad ka dei ka jingiohi jngai ki nongialam ban ioh ia ka jingithuh ba kyrpang ia ka riti dustur, da ka jingioh ia ka jylla ka long ba lah ban kam ba kane ka dei ka jylla jong ngi. Ha kane ka sngi u lat ka jylla u la kynmaw burom ia kito ki nongialam ha kato ka por ban pynioh ia ka jylla pura.
Ha ka jingkren u Lat ka jylla u la kdew ia ki kyrteng jong ki nongialam kum u bah B B Lyngdoh, u bah Edwin Bareh, Captain W A Sangma, u bah H S Lyngdoh, Professor G G Swell, u Stanley Nichols Roy, u H Hynniewta, u Wilson Reade, Professor R S Lyngdoh bad kiwei ki nongilam kiba don bynta lang ha ka jingpynioh ia ka jylla ba pura.
U Lat ka jylla u la ong ba ha kine ki 51 snem ka jylla Meghalaya kala kiew ha kiba bun ki long, ka rep ka riang, ka kam jngohkai pyrthei, ka jingpynmih bor ding, ka pule puthi, ka tehknology bad u la kyntu ruh iaki bor sorkar ka jylla ba pyndonkam ia ki jingmih kiba haka rukom kaba dei.
Ha ka jingkren u Chief Secretary u bah D P Wahlang la ong ba ka jingialeh ban ioh ia ka jylla ba pura ka long kaba khlem jawsnam, ka jingiakhih ia la ka jong ka jylla ka long ban pynneh pynsah iala ka jong ka ktien, ka riti dustur bad ban pynneh pynsah ia ka jinglong tynrai dei ha kum kane ka sngi la pynioh ia ka jylla ba pura jong ka jylla Meghalaya.
Ha kane ka sngi la pynbna ruh ia ki nongioh ia ka khusnam Meghalaya Day Awards 2023, ia ka khusnam U Tirot Sing Award 2023 ha ka toh katar bad pynneh ia ka riti dustur la ai sha ka ka kong Sweetymon Rynjah, Na ka bynta ki kam treimon sngewbha ka Pa Togan N Sangma Award 2023 la ai sha u Dr Jennifer V Basaiawmoit bad ha ki kam ialehkai U Kiang Nangbah Award 2023 la ai sha u Klingson D Marak.
Ha kane ka sngi la pynbna ia ki nongioh ia ka Governor Police Medals na ka bynta ki kam shlur naka bynta u snem 2023, kiba ioh ia kane ka khusnam ki long u Additional Superintendent ki pulit u bah Shabbir Sayeed Dkhar, MPS, u Deputy Superintendent ki pulit (DSB), u Vincent Nengminza Sangma, MPS, UBSI, u Iailamlang Iongi Jyrwa, UBSI, u Sean Stanford Lywait, WPSI, ka Renu D Momin, Havildar, u Mewan Roy Pakma, Havildar Amplias Synnah, BN/975 u Alphonse Lyngdoh Fireman bad u Shri Pyarson R Marak.
