Shillong, Jymmang 08: Ha ka sienjam ba thymmai ban pyniasoh ïa ka teknoloji bad ka jingsumar ïa ki nongpang, ka DAE-Civil Hospital Cancer Wing, Shillong, ka la sdang ïa ka VR-Assisted Guided Imagery Therapy ha ka 8 tarik Jymmang 2025.
Kane ka sienjam ba la lamkhmat da ka State Cancer Society of Meghalaya ha ryngkat ka jingïatreilang bad ka Ojaska Labs LLP bad ka jingkyrshan na SMRATA Trust, ka peit halor ka jingïarap jong ka Virtual Reality (VR) ban pyllait na ka jingeh ha ka jingsumar bad ban kyntiew ïa ka jingsngew bha jong ki nongpang kiba dang ïoh chemotherapy bad radiation.
La pynlong ruh ïa ka jingïasoi Memorandum of Understanding (MoU) ha ka jingïalang, kaba pynpaw ïa ka jingïatreilang hapdeng ka Tnad ka Koit ka Khiah jong ka Sorkar Meghalaya, Ojaska Labs LLP, bad SMRATA Trust.
Kane ka jingïasoi ka pynshisha ïa ka jingïatreilang ban pyntrei ïa ka VR-Assisted Guided Imagery na bynta ki nongpang cancer ha Meghalaya, da ka thong ban wanrah ïa ki rukom sumar ba thymmai ha ka digital therapeutics ha ka ba ia dei bad ka jing ai sumar ia ki nongpang cancer.
U Dr. Sampath Kumar, IAS, Principal Secretary, Department of Health and Family Welfare, Sorkar Meghalaya, u la pynpaw ïa ka jingkyrmen bad ka thong jong ka VR-Assisted Guided Imagery Study, da kaba ong ba kane ka dei ka lad kaba donbor ban ai ïa ka jingsumar ïa ki nongpang cancer.
“Lyngba ka Virtual Reality-Assisted Guided Imagery, ngi wanrah ïa ka tiar kaba khlain kaba lah ban pynbeit ym tang ïa ki jingsngew ha ka met kum ka jingpang, ka jinhtlot met, hynrei ka ai ruh ka jingmyntoi ban pyllait na ka jingsngew syier bad ka jingkyrduh mynsiem kaba lah ban mih na ka chemotherapy bad radiation.”
U Dr. Kumar u la pynpaw ruh ïa ka rukom wad bniah kaba shong ha ka jingshisha, da kaba pyni sha ki jingwad bniah ha ka pyrthei halor ka jingtreikam jong ka VR ban pynjem ïa ka jingsyier bad ban kyntiew ïa ka jingbha jong ki nongpang.
U la ong, ““Da ka jingïarap na Ojaska Labs bad SMRATA Trust, ngi lah ban pynpaw ba ka rukom ai jingsumar ka lah ban long kaba pynbha tam ia ki nongpang kiba lah ban shem jingeh ha ka por”.
U Dr. Sarat Addanki, Chairman jong SMRATA bad OJASKA Labs, u la ai ruh ka jingbatai kaba bniah halor ka rukom pyniaid ïa ka jingwad bniah, ka jingkhein jong ka Guided Imagery, bad ka jingpyntrei ïa ki VR headset ban ai ka rukom sumar kaba pynsngew shngain sha ki nogpang.
Ha ka jingbatai jong u, u Dr. Sarat u la kren shaphang ka jingjia kaba u la shem ha ka por ba u la long u nong ai jingsumar ïa la ka kmie kaba la ioh cancer bad ki jingeh ba ka kmie jong u ka shem ha ba ka lah ioh chemotherapy kum ka jing pyntlot met, bad ka jingling syier. Kane ka la pynshlur ïa u ban thaw ïa ka model jong ka Integrative Care kaba kynthup ïa ka traditional treatment bad ka imagery therapy.
Haba u la ïohi ïa ki jingmyntoi bad ka jingiarap ba ki nongpang ki ioh, u Dr. Sarat u la thmu ban pynmih ïa kane ka jingai jingiarap sha baroh ki nongpang cancer. “Ngi lap ba ka bor jong ka jingmut jingpyrkhat ka dei kawei na ki tiar kaba donkam haduh kata kata ha kaba ia dei bad ka koit ka khiah.”
Ka VR-Assisted Guided Imagery study kan pyndonkam da ki VR headset kiba ai jingkren ha ka ktien English, Khasi, bad Hindi. Ki nongpang kiba dang ïoh chemotherapy bad radiation kin shim bynta hapoh ka jingpeit jong ki nongsumar ia ka rukom sumar ban peit ïa ka jingkylla ha ka jingïaleh pyrshah ïa kine ki jingpang.
Ka jingwad bniah kan long haduh 10–12 bnai, lah don 3 bynta kiba kongsan, Ka VR-Assisted Guided Imagery ka la pynpaw ba kan wanrah ïa ka jingbha kaba shongnia ha ka met bad ka mynsiem jong ki nongpang cancer. Kane ka jingpyndonkam ïa ka VR ka long ha ki bynta bapher bapher ban pyntikna ïa ka jingmyntoi kaba khraw ha ka jingsumar.
Ka Dr. Anisha Mawlong, Specialist bad Head jong ka Oncology Department ha Civil Hospital Shillong, bad ruh ka Member Secretary jong ka State Cancer Society of Meghalaya, bad ka kynhun jong ka kiba pynpeit bad pyn trei kam ia ka VR-Assisted Guided Imagery Study.
Ka jingshemphang bad jingtip bniah jong ka Dr. Mawlong ka long kaba kongsam bha khamtam lei lei ha kaba iadei bad ka jingialam ia kane ka VR-Assisted Guided Imagery Study ban peit ba ki kam ki iaid beit iad ryntih.
La kdew ruh ba ka Ojaska Labs LLP ka dei ka kompani teknologi kaba khring ïa ka jingsumar da ki lad ba thymmai. Ki jingpynmih jong ki, ki treikam ban ai jingsngew suk sha ki nongpang.
Katba ka SMRATA Trust ka dei ka tnat paidbah kaba kyrshan ïa ki kam sumar ba thymmai, khamtam ha ki jaka ba ka teknoloji ka lah ban pynkylla ïa ka jingsumar bad ka bha ka miat jong ka imlang sahlang. Ha ka dak ka jingïarap, la ai ruh ïa ki nongpang da ki jingai kum ki shawl ba la shna da ki paidbah jong ka jylla bad ki jingbam ruh.
