Shillong, Naitung 24: Ka KSU naduh ba ioh jingtip ba ka samoi long VC ka NEHU u KN Srivastava ka la kut mynshem snem, ka la durut miet bad sngi ban wad lad ban pynsngew sha ki bor ba halor ba ha kane ka kynti kaba mynta la dei ban thung noh da u VC ba dei u trai ri trai muluk.
Kane ka jingangnud jong ka KSU ka long halor ka nongrim ba namar ba katei ka skul bah ka don ha Ri Khasi kumta kan jingdon da u VC ba dei u Khasi kan iarap shikatdei eh ban kyntiew ia ka pule puthi jong ki trai ri trai muluk kata ki Khasi namar u Khasi hi un sngewthuh kham bha shaphang ka jingdonkam ki Khasi namar ia lade ruh u dei u Khasi.
Shuh shuh ka seng ka sngewthuh ba lada ka sorkar pdeng ka seng ia kano kano ka jaka pule ha kano kano ka jaka, ka jingthmu ka long beit ban pynroi bad kyntiew ia ka pule puthi jong ki trai shnong kato ka jaka bad kumjuh ruh ban ai kam ai jam ia ki.
Kane ka rukom la sakhi ha man la ki jaka pule ha kylleng ka ri India khamtam ha kito ki jaka ba sah ki rit paid ba dang sah dien. Phewse la iohi pynban ba ha Meghalaya, ka NEHU ka duna palat ka jingshakri ia ki trai ri trai muluk namar ka jingpynrung klas bad ka jingai kam ai jam kam long pura ia ki trai shnong. Naduh ba la seng ia kane ka skulbah ha u 1973, la iohi ba tang uwei u Khasi u ioh ban long Vice Chancellor kata u Ma B. Pakem.
Naduh ki por kiba mynshwa ka KSU ka ju ieng beit ha ka nongrim ba ia ka kyrdan VC dei ban thung beit da ki trai jylla khnang ban pynurlong ia ka jingangnud bad mat treikam ka NEHU. Mynshwa la dawa ia u Dr. David Reid Syiemlieh ban long kum u VC ka NEHU hynrei naduh mynshwa bad haduh mynta ki sorkar ha Delhi kim ju kheiñ snep ia ki jingud jingnam ki nong Meghalaya khamtam ka KSU.
Kumba la kdew haneng ba naduh mynshem snem ha shwa ban kut ka samoi u KN Srivastava, ka KSU ka la trei durut ba ha kane ka kynti mynta ka sorkar India ka la dei ban sngap noh ia ka sur ki nong Meghalaya da kaba thung VC noh da u Khasi ha NEHU.
Ka KSU mynshem snem ka la leit ban ai dorkhas bad ia kynduh ia baroh ki nongialam jong ki kynhun saiñ pyrthei kiba don ha ka jylla ban pan jingkyrshan bad kyntu lem ia ki ban dawa lem da u VC uba dei u Khasi. Shuh ka KSU ka la ai dorkhas bad leit ia kynduh ia baroh ki myntri ka sorkar jylla kynthup ia u Myntri Rangbah halor kane ka juh ka phang.
Nyngkong ka KSU ka dawa bad kyntu ia kiwei kiba don kajuh ka thong ba ngin ym jied paralok lane ngin ym jied kyrpang tang iwei i Khasi ban dawa thung VC napdeng kiba bun ki Khasi kiba la iahap bad i don hok ba ioh ia kane ka kyrdan.
Pynban ka KSU ka ieng ha ka nongrim ba ka jingdawa ka long ban thung beit da u Khasi kum u VC bad ban jied ia uta u Khasi ka shong ha ka jingstad ka Selection Committee jong ka sorkar pdeng.
Hadien ba la ioh jingtip ba ka Selection Committee ka la jied ia ka Dr. SM Sungoh kum kawei na kiba ibit ban bat ia kane ka kyrdan. Ka KSU ka phah ki dorkhas bad kumjuh ruh ka la leit ban ia kynduh katba ioh lad ia ki MPs bad ki Union Ministers bad kyrpad na ki ban kyntu ia ka sorkar pdeng ban jied beit da ka Dr. Sungoh.Ka KSU na ka bynta kane ka kam ka la leit ruh shaduh Delhi ban pynsngew bad pan jingiarap.
Mynta u snem ka KSU ha Nongbah Delhi ka la ioh ban ia kynduh ia u MP ka jylla u Ma Vincent Pala, u nominated MP ka Rajya Sabha u Rakesh Sinha, u Union Minister of Sports u Kiren Rijiju bad ia u Agriculture Union Minister u Narendra Singh Tomar. Ka KSU ka la ai dorkhas ia kine baroh bad kyrpad ba kin iarap lem ha kane ka mat.
Phewse, ka sorkar India ka la shet biang plak ym tang ia ka KSU hynrei ia ka jylla baroh kawei da kaba thung biang VC biang da u briew ba nabar ka jylla. Kane ka jingbym suidñiew ka sorkar pdeng ka pynpaw tyngkreiñ ia ka jingibeiñ ia ka Jaidbynriew Khasi tang namar ba ka dei ka Jaidbynriew ba rit paid.
Hadien ba ka sorkar pdeng ka la kheiñ dewthala ia ka jingud jingnam ki paid ka jylla, ka KSU ka la sngew artatien halor ka mat jong ka ILP khamtam hadien ba la pyntrei kam ia ka CAA, ka aiñ iakjakor kaba ki trai ri ka jylla ki pyrshah jur, la ong u samla Donald V Thabah general secretary bad u Raymond Kharjana Education Secretary.
