Shillong, Iaiong 26: Ki nongkhaii kane ka nongbah Shillong ban pynpaw ia ka jingpynrem jur ia ka jingsah siat iap ki riew paidbah ki nongleit jngohkai pyrthei ha ki lehnoh ha Pahalgam ha Kashmir kin pynlong ia ka jingkhang dukan kaba shi sngi ha Shillong ha ka sngi Nyngkong 28/04/2025.
Kane ka jingsiat pathar ia ki riew paidbah katba ki dang leit ban jngohkai ia ka jingitynnad ka mariang kane ka ri jong ngi, ki nongkhaii kane ka nongbah Shillong ki dawa na ka sorkar pdeng ba shimbaroh ki lat ki lynti ban pynshitom ia ki nongleh kam sniew.
Ia kum kine ki jingleh yn nymlah ban pdiang, kum ki nongkhaii kane ka nongbah Shillong ki don lang bad kito kiba ha iing ha sem kiba ngatha kane ka jingjia kaba sngewsih kaba la wan lap khlem poi pyrkhat.
Na ka liang jong ki nongkhaii kane ka nongbah Shillong ki kyntu ia ki para nongkhaii ba ia shnoh kti lang ha kane ka jingkhang dukan kaba shisngi ban pynpaw ia ka jingpyrshah ia kane ka jingshah siat iap ki riew paidbah da ki lehnoh.
Haba kren ha u SP News Agency u wei na ki nongkit kam la ong ba ka jingkhang ia ki dukan kan long baroh shisngi, kane ka long tang ka jingkhot sngewbha ia baroh ki nongkhaii,kim shym pynbor iano iano ruh, ka dei tang ka jingkyrpad ba ia shnoh kti lang ban pyrshah ia kaei kaba la jia ha Kashmir.
