Shillong, Jymmang 31: Ka Employment Generation Cell jong ka Khasi Students’ Union Central Executive Council hapoh ka jingïalam jong U Samla Manly Nongpluh kum u Chairman kane ka shnat treikam jong ka KSU mynta ka sngi ka 31-05-2021 ka la kyntu ïa ka Sorkar Jylla ba kan phai khmat lem ban peit ïaki jingeh kaba ki nongbylla sngi baroh ki ïa kynduh kum ha kane ka por.
Kum shi bynta ban pynsngew sha ka Sorkar ïaka jingduh kamai jong kiba bun ki nongbylla sngi namar ka jingwan sar biang ka khlam haka wat kaba ar bad ka jingkhang dam kaba kot sha ka shi bnai lynter.
Ki nongñiah taksi, ki Nongdie madan bad ki nongbylla sngi kiba duna ka ïoh ka kot ki mad shibun ki jing tynjuh hakum kane ka por bad kila poi haka kut lad ban kamai khamtam eh ban pyndap pynbiang ïa ki jingdonkam bad ban kyrshan ïa ka ïing ka sem ka jong ki ha kiba bun ki liang lyngba ka kamai kajih.
Na ka liang ka Cell ka ai jingmut sha ka Sorkar ba kan thaw da kino kino ki lad jingïarap la ka long ki lad jingïarap na ka Sorkar Kmie lane ka Sorkar Jylla sha baroh ki nongbylla sngi salonsar ha kylleng ka Bri U Hynñiewtrep khnang ba ka jing ïakhun ban pynduna bad ban pyn duhjait ïa u khlam Covid-19 kan long kaba ryntih bad kaba jop.
