Shillong, Lber 18: U Bah Badapjiet Kylla u wei na kiba la pass ia ka eksam Meghalaya Eligibility Test (MTET) u la ong ba ka sorkar ka dei ban but ia ki kyndon jong ka NCTE bad ban thungkam noh ia kiba la pass ia katei ka eksamin.
Haba kren ha ki lat pathai khubor mynta ka sngi ha Shillong Press Club u la kyntu ia ka sorkar ba kan pynsted noh ha kaba thungkam ia kiba la pass ia ka eksmin MTET, la ong ba kiba dei na ka Upper primary kiba pass baroh ki long 1670 ngut tam bad na ka Lower Primary ki don 2900 ngut.
U Bah Kylla u la ong ba kane ka jingpynsngew mynta ka sngi ka long ha ka kyrteng jong baroh kito kiba la pass ia ka MTET ba ka sorkar kan pynsted noh ha kaba thung ia ki kum ki nonghikai kiba pura kumba ka sorkar kala angnud ba kan pyndep ia kane ka kam da kaba pynlong ia katei ka eksamin.
Haba ia dei bad ka jingdawa jong kito ki nonghikai kontrak kiba khlem pass ia ka eksamin MTET na ka liang jong ki kim don ei ei ban ong, kaei kaba ki kwah ka long ba ki kyrpad ia ka sorkar ba kan pynkloinoh ia ka jingthung ia kiba la pass kum ki nonghikai ba pura.
