Shillong, Jymmang 22: Ban ia tynrong lem ia ka khia ka shon haba ki Nong shong shnong ki Paradoh-Para snam ki ia kynduh ïa kino kino ki jingeh bad khamtam na duh ba ka jylla jong ngi ka la shah ktah ha kane ka khlam COVID-19.
Mynta ka sngi ka Khasi Students’ Union Upper Shillong Circle ha ka jingialam u samla Shngaiñlang Sohkhlet President, u samla Shelkitbok Kharbani General Secretary, bad u samla Hopefull born L Mawnai Finance Secretary KSU upper Shillong Circle ka la ioh ban noh jingiarap sha ki 45 tylli ki longïing jong ka Shnong Nongkseh da ki marbam kum u Khaw, Dai, Umphniang bad kiwei-kiwei.
Kum ban shu pynkynmaw ka shnong Nongkseh ka dei ka shnong kaba la shah pynngat kum ka Containment Area ha kaba ki nong shong shnong ki hap ban shong set slung ia lade khnang ban iada na ka jing saphriang une khñiang jingpang Covid.
Ha kane ka sngi na ka liang ki Volunteer jong ka Shnong ki la pynpaw ka jingsngew nguh bad ai khublei ia ka seng ka ju kloi ban noh jingiarap haba kynduh jingeh bad ki la ai ruh ka jingkyrkhu kyrdoh ba ki dkhot ka seng kin dang shait dang khlaiñ bad kin dang lah ban trei na ka bynta ka bha ka miat ki para Ri bad ka Jaitbynriew hi baroh kawei.
