Shillong, Naiweing 28: Ki nonghikai Adhok jong ka jylla Meghalaya kiba kyntup naduh Lower primary ter ter haduh ka Higher Secondary kila thaw ia ka seng “Federation of All School Teacehrs of Meghalaya”(FASTOM) ban peit ia ki jingeh jong ki nonghikai skul adhok ha ka jylla.
Haba kren ha ki lad pathai khubor mynta ka sngi u bah Kenneth Shadap u la iathuh ba ki nonghikai Adhok ha ka jylla baroh ki don 7042 ngut bad ka jingeh kaba ki ia kynduh ka long halor ka jingsiew ka bym ia hap hapdeng ki para nonghikai. Ka seng kan ia leh ban trei na ka bynta ban pynioh ia ka hok jong ki ha kaba ia dei bad ka jingsiew.
Na ka liang jong u Bah Shadap u la pynpaw ruh ba kum ka seng nangne sha khmat haba kin leit sha ka sorkar jylla lane ka sorkar pdeng na ka bynta ka jingdon kam ka jong ki kin leit ha ka kyrteng jong ka FASTOM ban ia kren. La iathuh ba mynta ka tnad pule jong ka sorkar kala pynmih ia ka hukum ban seng ia ka seng ki nonghikai hap ban ioh ia ka jingbit na tnad pule jong ka sorkar jylla.
Nalor katei ka phang kaba ktah eh ia ki nonghikai, la iathuh ba ki don dei kiwei kiwei ki jingthmu jong ka seng ban kyntiew ia ka pule puthi ha ka jylla, hynrei u la pynpaw ruh ia ka jingsngewdiaw namar ba la bun palat ki rukom buh kyrdan ia ki nonghikai skul ka jingpule kala hiar ha kane ka jylla la ong u bah Shadap.
Haba jubab ia ki jingkylli na ka liang jong u Bah Shadap u la ong ba la don kam ia ka “Education Commission” ha ka jylla namar bun ia ki jingeh kaba ki ia kynduh ki hap ban leit sha High Court kane ka bam ia ka por bad ha ka juh ka por ka ktah ruh ia baroh ar liang lada ka don ka Commission kan ia rap ban weng ia ki jingeh.
La pynpaw ruh ba kan bha lada ia ki skul ha ka jylla kin don noh tang lai tylli, Government School, Government Aided School bad Private School. Hynrei kumba ka long mynta kila don bun ki jaid skul haduh ba kala ktah ia ka pule puthi ha ka jylla, ha kaba ka jingpule kala hiar kyrdan.
