Shillong, Kyllalyngkot 29: U Nongialam ka Congress bad Chief Executive Member barim ka Khasi Hills Autonomous District Council u Bah Pynshngainlang N Syiem hynne ka sngi u la pyndep ban thep kyrteng na bynta ban iakhun ia ka ilekshon MDC na Mawkhar-Pynkhorumkhrah Constituency kaba u la mihkhmat mynta.
U Bah Pynshngain u la pynpaw ia ka jingsngewskhem ba ki paidbah ka constituency kin ai ka jingshaniah ha u bad pynthikna ba un shah jied biang ban leit mihkhmat sha District Council.
U la ong ba u sngewskhem ban jop ia ka ilekshon namarba shibun ki kam ba u la noh synniang sha ka constituency bad ruh ha KHADC lyngba ka jingmynjur ia ki bill bapher bapher.
“Ngi la wanrah ia ki amendment ba donkam ban ai jingithuh ia ki Seng Kynthei bad Seng Samla ha ki Dorbar Shnong” ong u Bah Pynshngain haba ban jur ia ka jingdonkam ban wanrah shuh shuh ia ki amendment ban pynjanai bha ia kiba bun ki aiñ ha KHADC khnang ba kin nang khlaiñ bad treikam bha na ka bynta ka jingmyntoi ki paidbah ka thaiñ.
U la ong ba ka party jong u ka seng Congress ka la leit sha ki paidbah ban pan ia ka jing kyrshan halor ki 10 tylli ki mat ba kynthup ia ka jingdonkam ban buddien ia ka jingtyrwa ban pynkylla ia ka Sixth Schedule ka Riti Synshar ka Ri bad ruh ban pynthikna ba kine ki amendment kin ai jingmyntoi ia ki paid riewlum trai jylla.
U la ong ruh ba ka party kan ialeh ban pynjanai ia ka jingtreikam jong ka Executive, Legislative bad Judiciary jong ka KHADC lada ka shah jied ha ka bor nalor ban pynkhlain ia ka pla tyngka jong ka KHADC da kaba pynjanai ia ka jingpynmih pisa ban pynthikna ba ki nongtrei ka Council kin nym mad ia ka jingeh haba iadei bad ka jingsiew tulop.
