Shillong, Lber 23: Mynta ka sngi ka Jaiñtia Students’Union Seng kmie (Central Body) kala phah da ka jingthoh
sha U Divisional Commercial Manager ka office Jong ka NorthEast Frontier Railway.
Ka seng ka dawa na ka Northeast Frontier Railway ba kan buh biang ia ka Railway Booking counter ha Jowai hadien ba lah ìng duh ka ophis treikam ka MTC Jowai .Lah ar snem mynta ki nongleit nongwan shabar jylla na ri lum Jaintia ki shem jingeh ban thied ticket train ban leit donkam shabar jylla.
Ka seng JSU hadien ba lah ioh jingtip lyngba ka shithi ba phah naka ophis Northeast Frontier Railway sha u Managing Director jong ka Meghalaya State Transport Corporation haka 15 tarik u March,2021 bad hakane ka shithi lah thoh ban phah khang noh shisyndon iakane ka jaka die ticket train ha Jowai.
Ka seng JSU ka sngewkhia iakane ka jing ñiewbeiñ ka tnat Northeast Railway Frontier (NFR) iaka ri lum Jaintia bad ka seng ka lah dawa na ka NFR ba kadei ban wan buh biang ia kane ka ophis lane ticket counter ha Jowai ba kan pynsuk ia ki paitbah ka thaiñ Jaiñtia khamtam ia ki Khynnah pule ka thaiñ namar kiba bun ki Khynnah pule kiba leit shabar ka jylla.
Ki Skul bad College kin hap ban book ia ki Train Tickets nangne namar kadon ka bhah kyrpang ia kador ticket haduh 75 percent Duna ia ki Khynnah pule bad kumjuh kan pynsuk ia baroh ki nongleit nongwan ka thaiñ Jaintia ban leit jingleit da ka train sha kiwei pat ki jylla. Kyrwoh ba lah phah da u Publicity Secretary JSU seng kmie u samla Dapmain Suchiang.
