Shillong, Naitung 27: Mynta ka sngi ki MDC kiba don ha ka liang pyrshah hapoh jong ka Khasi Hills Autonomous District Council (KHADC) kum ka kynhun United Democratic Front kila lum kyrieh ia ka jingialang ban ia kren halor ka jingwan leh don bor ka Assam ha shnong Iongkhuli ha Ri Bhoi District haba ki pulit kila ktah kti ia u MDC jong ka Mawhati u bah Charless Pyngrope.
Haba kren ha ki lat pathai khubor u shongknor jong kane ka kyndhun UDP u bah Pynshngian Syiem la ong ba kane ka jingialang kila shim ia ka rai ban thoh sha u CEM jong ka KHADC ba un khot ia ka jingialang jong baroh ki MDC ban ia kren ia kane ka jingjia namar kane ka jia hapoh u pud u snem jong ka KHADC.
Ka UDF ka pynrem jur ia kane ka jingleh jong ki pulit ka jylla Assam kiba la ktah da ka kti ia u MDC u ba la jied da ki paidbah, kum ki MDC ki pynrem jur ia kane ka jingleh jong ki pulit Assam ban wan dkhol ia ka jaka kaba dang hap hapoh jong ka jylla Meghalaya.
U Bah Pynshngian u la ong ba kane ka jingjia baroh ka dei ka jingtlot jong ka sorkar jylla ban ia khun pyrshah ia ka jingwan leh don bor jong ka jylla Assam ha ki khappud kumba ka la jia ha ka shnong Iongkhuli, ka sorkar ka dei ban pynkhlain ia ki bor pahara ha khappud.
U Bah Gabriel Wahlang ha ka jingkren jong u la ong ba kane ka jingleh jong ki pulit Assam ka dei ka jingpynibor bad u pynrem jur ia kaei kaba kila ktah kti ia u MDC bala jied da ki paidbah ha shnong Iongkhuli.
U bah Charles Marngar u ba la shah ktah kti u la ong ba ha katei ka jingjia u la pyntip sha u symbut myntri rangbah ka jylla u bah Prestone Tynsong, ha kaba u phone nyngkong u symbut myntri rangbah kala jylla u shim ia ka phone bad ha kaba u phone ar sien u khlem shim shuh bad haduh mynta ka sngi u khlem jubab ei ei.
