Mairang , Naitung 17: U Lamphang ka iing dorbar thaw ain ka jylla u bah Metbah Lyngdoh haba haba kren ha ka jingrakhe ia ka lyngkhuh sngi iap kaba 186 jong u Syiem ka hima Nongkhlaw u Tirot Sing Syiem ha Mairang u la ong “ba to ngin ia bud ia ki dienjat jong u Syiem Tirot Sing Syiem ban don ia ka jingkitkhlieh ha ka kam kaba ngi trei”.
La ong ba u Syiem Tirot Sing Syiem u la khlad dang ha ka rta kaba dang khynnah hynrei u la pyni ia ka mynsiem ba kum u syiem u don ia ka jingkitkhlieh bad kane ka dei ka nuksa, kaba baroh ban ia bud haba trei ka kam la ka dei ha kano kano ka bynta ban don ia ka jingkitkhlieh.
Ha ka juh ka por u Lamphang ka iing dorbar u la pynpaw ia ka jingsngewsih ban iohi ba bun ki hima ki ialeh mar kylliang hapdeng ki khun ki hajar jong ka hima bad kine ki jignjia ki wanrah ia ka jingduh jingkyrmen. U Syiem Tirot Singh Syiem u dei u nongmuna kaba ngin ia bud da kaba peit ia ka mynsiem jong u.
U bah Metbah ha kane ka sngi u la pynsngew ia kiba bun ki kam kiba la leh na ka bynta ka konstitwensi baroh kawei, kum ka jingpynbha ia kane ka madan Tirot Sing, ki surok khamtam ia ka surok na Mairang sha kad Liengsuin ha Guwahati kaba la pynbha ia kane ka surok bad ka jingpynbna u myntri rangbah ia ka District thymmai ha Mairang.
Ban wanrah ia ka roi ka par, u bah Metbah ba dei ruh u MLA jong kane ka jaka u la kyrpad ba kin ai ia ka jingiatreilang ban wan rah ia ka roi ka par ha thain, u Lamphang ka iing dorbar u la kynthoh ban don ki briew kiba dei kyrteng na ka bynta ka jingmyntoi shimet, u la ong haba u kren kumne kam mut ba u issih ia kiwei ki jaidbynriew hynrei don kam ia ka jingiatreilang.
Kiwei kbia la kren ha kane ka jingrakhe ia ka lungkhuh sngi iap kaba 186 ki long u bah Batskhem Ryntathiag MDC, u bah CVD Diengdoh Director ka tnad jngohkai pyrthei, u bah A. Nongbri SDO ka Mairang Civil Sub Division, Ha kane ka sngi la don lang ruh ki myntri ka Hima bad ki ophisar kiba don ha Mairang Civil Sub Division.
Ia ka jingialang ban rakhe ia kane ka sngi ha Madan Tirot ia ka jingleh buhrom na ka Hima ia u Syiem Tirot Singh la pyniaid da u Syiem u Pa,im P M Syeimlieh, la kren pdiang burom da u Syiem Khynnah u bah K M Syiemlieh bad la kren ai khublei da u myntri Boldness L Nongum.
