Shillong, Nohprah 20: Ki khun ki hajar jong ka Hima Nongspung mynta ka sngi kila leit tur sha ka ophis jong ka Khasi Hills Autonomous District Council (KHADC) ban pynpaw sha ka Executive Committee jong ka KHADC ba ki pyrshah ia ki nongujor ia u Syiem jong ka Hima u Pa’im Petrick Syiemiong.
Ki khun ki hajar haduh mynta ki dang ai ka jingshaniah ha u Syiem jong ka Hima u bad ka long kaei kaei kaba sngewlyngoh ban tip ba ki don ki briew kiba la leit ban ujor pyrshah ia u Syiem, kane ka jingwan jong ki sha KHADC ka long ban pyni sha kibor jong ka KHADC ba ki khun ki hajar bad ki lyngdoh kiba dei ki nongjied ia u Syiem ki dang ai ka jingkyrshan kaba pura ia u Syiem.
Ha kawei na ka jingkhoh kaba la rah ha khmat jong ka ophis jong ka KHADC na ka liang jong ki lyngdoh kiba dei ki nongjied ia u syiem jong ka hima kila thoh ba ki pyrshah ia ki nongujor pyrshah ia u Syiem jong ka hima. Ha kawei pat ka jingthoh kaba dei na ka liang jong ki shnong kila thoh ba ki pyrshah ia kito ki briew kiba la pyrshang ban pynhair khet ia u Syiem ka Hima.
Na ka liang jong ka Ku Syiem kaba dei ka jur ba sei ia u Syiem u kmie jong ka hima kila thoh shai ha ka jingthoh ba ki pyrshah jur ia ki nongujor ba kum ka kur kaba dei ban sei ia u syiem u kmie jong ka hima kim don kano kano ka jingujor pyrshah, kum ka kur ka pynrem jur ia ki nongujor.
Ha kane ka jignwan jong ki khun ki hajar sha KHADC mynta ka sngi ka long na baroh ki liang jong ka hima, ka kur Syiemiong, ki dorbar shnong, ki lyngdoh kiba jied ia u syiem u kmie jong ka hima bad kine baroh ki pynrem jur ia ki nongujor pyrshah ia u Syiem jong ka Hima.
