Shillong, Iaiong 09: Ki Nongïalam ka Awaken India Movement (AIM) hynne ka sngi ki la pynlong ia ka jingialang paidbah ban pynpaw ia ka jingpyrshah halor ka jingshah pynbor ban shondur Aadhaar.
La pynlong ia kane ka jingialang ha khmat ka durmot ba shi rynieng jong u Woh Kiang Nangbah kaba don ha khmat ka Civil Hospital Shillong bad da ki Spah ngut ki paidbah na kylleng ka rikhasi ki la wan ban ia shim bynta ban pynpaw ka jingpyrshah ia kane ka jingthmu jong ka sorkar.
Haba kren ha kane ka sngi u Chairman ka AIM u bah Banshai Marbaniang u la ong ba ka riti Synshar jong ka ri INDIA ka ong ba ki paidbah ki don ka hok ban ieng pyrshah lada don kino kino kiba wan ban pynbor.
U la ong ba ngin ïeng ban ia khun pyrshah bad ngim dei ban ailad, ngi don ka hok ban pynpaw ia ka jingpyrshah. Ngi dei ban pyni ba dei ma ngi kiba jied ia ki MLA, ka surok ka dei ka jong nga ka jong phi bad ka secretariat ruh ka dei ka jong ngi, ym don mano mano ban kam trai bad ban ong ba ka dei ka jong nga shimet.
U bah Adelbert Nongrum MLA ka North Shillong Constituency u la wan poi ha kane ka jingialang ka AWAKENING INDIA MOVEMENT haba kren ha kane ka jingialang u la ong, ym lah ban pynbor la ka dei ha skul ne kolej lada ki ong ba donkam ban leh Aadhaar pan da ka jingthoh.
U bah Adelbert Nongrum u la ong, “Ngi la mad na ka por sha ka por, ka jingshah pynbor ban shon Adhaar, ki ong la da khlem u Adhaar ki paidbah kim lah ban ioh ki jingmyntoi kiba man ka sngi.
U la ong shuh shuh ba uwei na ki nongialam bym pat leh ia u Adhaar bad bym par ai vaccine, u la ong ba u shah rkhie beiñ, bad u la ong ba katba um pat ioh ka jingshai un nym treh ban leh Adhaar”
“Mynshwa ki jingmyntoi ki wan khlem da donkam Adhaar, hynrei, balei mynta pat ki pynbor ban leh Adhaar. Balei kim pynmih ia ka aiñ ba kito ki bym don Adhar kim dei ban ioh thep vote” la bynthei u bah Adelbert Nongrum.
Shuh shuh u la ong, ki 59 ngut ki MLA ki dei ban shim ka jingkitkhlieh haba mih ka jingiakhih pyrshah Adhaar. Ha kane sngi ka kynhun ka la pyrshang ban tur sha secretariat hynrei na ka liang ka bor district bad ki pulit khim shym la ailad ia ki.
