Shillong, Nailar 3: Ka Jaintia Hills Autonomous District Council (JHADC) kala tyrwa lai tylli ki jaka sha ka Jowai Municipal Board (JMB) ba kan jied kawei na pdeng jong kita ki jaka ba kan pynlong jaka theh niut.
U bah Wailadmiki Shylla MLA jong ka Jowai u la ong ba ia kane ka jingtyrwa jong ka JMB la phah sha ka sorkar ban kan shim ia ka rai ban jied kawei na ki lai tylli ki jaka kiba ka JHADC kala dep ban tyrwa sha ka sorkar.
Ha ka juh ka por la ong ba katkum ka jingiateh kular mynshuwa hapdeng ka sorkar bad ka JHADC ba ka District Council ka dei ban ai ia ka jaka theh niut, ka sorkar ban shna ia ka bad yn ia pyndon kam lang hapdeng ka JMB bad ka JHADC.
Kumba ka long ka JMB naduh kaba sdang kala dep ban kren shai ba ka jingbret ia ki nuit sha Mupyut ha lynti ban leit sha Amlarem kan long tang shipor, hynrei ki shnong kila pyrshah ia kane dei na kane ka daw ka sa mih kane ka jingeh.
Kumba ka long mynta ka jinglum ia u niut ka long na baroh kawei ka sor Jowai hynrei tang khyndait eh ki jaka kiba hap hapoh jong ka JMB bad kala don ka jingdokoh ka jingtrei kam naduh kaba sdang haduh mynta.
