Shillong, Nailur 21: Ka 3rd Sohra International Half Marathon mynta u snem ka la long kaba jop ha ka ba la wan ban ia shim bynta na duh ki khynnah rit, ki rangbah, ki samla kynthei bad shynrang bad kumjuhruh ki longkmie bad kynthup lang ruh ia ki nongiamareh ki ba na bar Ri bad khamta ki ba na kane ka jylla.
Ha kane ka kynti ba mynta kata ka 21 tarik u Nailur 2024 da palat 7200 ngut ki nongmareh kila iashimbynta ha ka jingiakop 3rd Sohra International Half Marathon ha kaba u Akashay Kumar lem bad ka Ankita Ben Gavit kila ioh khur ia ka nam lahduh ha ka jingiakop 21K ki shynrang bad kynthei. Hakane ka kynti ba mynta ka jingiakop mareh ka la don ha ki lai tylli ki Category kata ka 21K, 10K, bad ka Run for Fun (5K).
Kane ka jingiakop mareh kaba la ap khmih lynti bha da ka Jylla, ka dei kaba la pynlong da ka Tnad Sports & Youth Affairs ka Sorkar Jylla ha ryngkat ka Meghalaya State Olympics Association bad ka Meghalaya Athletics Association.
Ha kane ka 3rd Sohra International Half Marathon lawan ban iadon bynta langruh da u Myntri katnad Revenue and Excise u bah Kyrmen Shylla kum u kongsan ha ka jingiadon ryngkat lang u MLA ka Sohra u bah Gavin Miguel Mylliemngap, u MLA ka Shella u bah Balajied Kupar Synrem, u MDC ka Sohra u bah Titos Chyne.
Ki ophisar la don lang ka commissioner & secretary ka tnad sports bad Youth Affairs ka Kong Isawanda Laloo, Director ka tnad u D D Shira, ki nongkitkam ka MSOA, ki officer ka tnad Ialehkai ka Jylla lem bad kiwei kiwei pat.
Haba phai sha ka jingiakop mareh ki shynrang ba 21K Elite, u Akashay Kumar ula wan ba nyngkong da ka jinglah ban pyndep ia ka thong tang hapoh ka 1:03:00 minit bud pat sa u Lovepreet Singh u ba la pyndep hapoh ka 8:06:49 minit bad u Kailash Chaudhary u ba la pyndep hapoh ka 8:08:31 minit. Katba na ka liang ki Khasi tang u Jomsingstar Ramsiej u ba la lah ban pyndep hapoh ka 8:14:46 minit.
Ha ka jingiakop mareh ki kynthei pat ba 21K Elite, ka Ankita Ben Gavit kala ioh rah ia ka lahduh da kaba pyndep ia ka thong hapoh ka 1:40:04, katba ka Tamsi Singh kala lah ban pyndep hapoh ka 8:17:42 minit, bud pat sa ka Nisha ka ba la pyndep hapoh ka 8:25:30 minit.
Ha ba phai sha ka 21k na ki shynrang ka Jylla la sakhie ba u Kresstarjune Pathaw u la lah ban pyndep ha poh ka 8:10:01minit, bud pat sa u Emphius Nongrum bad u Teiboklang biam. Kat ba ha ka liang ki kynthei ka Phyrnai kyndait ka la lah ban pyndep hapoh ka 8:34:17 minit bud pat sa ka Bandasharai Marwei bad ka Filinza Hansepi.
Napdeng kine, palat 2000 ngut ki nongiamareh ki dei kiba na Sohra. Ki trai shnong ruh kila iamih bha ban wan kyrshan ia kane ka lympung iakop mareh da kaba leit iarap ha ki kam bapher bapher kynthup ka jingpynkhuid nalor ka jingiamih ban ai mynsiem ia ki nongiamareh. Ha kane ka 3rd Sohra International Half Marathon la ioh ruh ban sam ia ki takma sa baroh ki nongiashim bynta kum ka dak jong ka jingpyrto ia ka jingwan ban ia shim bynta jong ki.
