Shillong, Naiwieng 09: U Myntri Rangbah ka jylla u Conrad K Sangma haba jubab ia ka jingkylli jong u bah Syntar Klas Sunn MLA, la ong ba haduh mynta kam pat don kata ka jingaiti ban tih dewiong ha kane ka jylla.
Hab ia dei bad ka jingapply ban ioh ia ka jingbit ban tih dewiong ka dang iaid katkum ki kyndon jong ka Mines and Minerals(Development and Regulation) Act 1957 bad ka Minerals Concession Rules 1960 bad la bud ia ki kyndon ban ioh ia ka jingbit ban tih dewiong. Kumba ka long haduh mynta kam pat don kano kano ka jingtih dewiong ha ka jylla.
Haba jubab ia ka jingkylli bynrap jong u Zentih Sangma, u myntri rangbah u la ong ba ha dien ba la khang ia ka jingtih dewiong ha u snem 2014 kala don ka jingpan jingkhein ia ka jingdon u dewiong bad katkum ka jingkhein ha katei ka por kaba la ai da ki trai dewiong ka long 1.34 Core MT bad ha dien ka NGT kala shim ia ka jingkhien bad kala buh ba u dewiong ba dangsah u la long 95 lakh MT.
U myntri rangbah u la pynshai shuh shuh ba ha dien kane ki trai dewiong kila kyrpad ia ka sorkar ban don biang ka jingthew bad ha dien ba la thew bad la phah sha ka sorkar iing bishar kaba ha khlieh bad ka la pdiang ba u dewiong ba dang sah ba khlem pat thew u long 32 lakh MT.
U Myntri Rangbah la ong ba ka jingpher ka long kumba 40 lakh MT haba shim na ka jingkhein kaba la leh ha u snem 2015, kane kam dei ka jingkhein kaba thymmai hynrei ka dei kaba la don lpa naduh u snem 2015 ia kaba la ai jingbit da ka iing bishar kaba ha khleihduh jong ka Ri India bad ka NGT.
Ha dien ba la ioh ia ka jingbit na ka iing bishar kaba ha khliehduh ka sorkar kala ia kren bad ka NGT bad ha kane bun ki kyndon kiba hap ba bud dei na kane ka daw kaba la shim por ban kit ia u dewiong , hynrei ka sorkar ka lah ban pynbeit ia kane ha kaba la lah ban ioh ar tylli ki Depo ha East Jaintia, kawei ha West Khasi Hills, kawei ha Suoth West Khasi Hills bad kawei ka South Garo Hills District.
Haba ia dei bad ka jingkylli halor ka jingkit beain ia u dewiong, u myntri rangbah u la ong ba ka sorkar kala kem ia kiba leh beain, ha u snem 2014 la kem 203, ha u snem 2015 la kem 541 tylli, ha u snem 2016 la kem 117, ha u snem 2017 la kem 274 bad ha u snem 2018 la kem 400 bad ki ejahar kiba la ujor haduh mynta ia kiba leh beain ki long haduh 2000 tylli.
Ban khanglad ia kane ka jingleh beain ka sorkar kala pynjari ia ka kyndon 21(4) bad katkum kane ka kyndon ia kiba leh beain lah ban set along san snem bad ka kuna san lak tyngka, ban khanglad ia kane ka jingle beain la buh ia ka jingiaphara lang, ka sorkar kala buh ia u wei u number ban pyntip lada don kiba leh bakla.
Ban dang pynkhlain shuh shuh ban khang ia kane ka jingle beain ka sorkar kala pynbna ruh ia ka jingai khusnam kaba T.5000/- ban ai sha kito kiba pyntip lada don kiba leh beain, haba ia dei bad ki shallan ka sorkar kala buh ia ki high security Challan bad ka sorkar kan bun noh ia ki Smart Integrated Check gate. Nalor kane ka don ruh ka kynhun ban peit bniah ia kaba la khleih da u Chief Secretary jong ka jylla ha kaba la don lang u DGP bad u Secretary ka tnad mining bad Geology.
Haba jubab ia ka jingkylli bynrap jong u bah George B Lyngdoh, halor u dewiong ba kit mynta, na ka liang jong u myntri rangbah u la ong ba une u dewiong ba kit mynta dei u dewiong ba la ioh ban kem bad u dewiong u ba khlem don ba wan kam trai.
