Shillong, Nohprah 17: Kum ka jaidbynriew Khasi la dei ban sngewsarong ba ki don ki rang da jied kiba la don ha ki kam shipai naduh ki snem 1956 ter ter haduh kine ki sngi kiba mynta kila dang ia bun kiba ia rung sha kane ka kam shipai ban iada iala ka jong ka Ri.
Ha ka jingpynkup burom ia ki shipai kiba dang don haduh mynta kiba dei na kane ka thain shatei lam mih ngi da ka Bureau of Outreach and Communication ka tnad pathai khubor jong ka sorkar pdeng ia ki shipai kiba la ia don bynta ha ka thma Bangla 1971 ar ngut ki khasi kila poi sha kane ka jingshah pynkup burom.
U Naik Sarshon Lyngdoh, haba kren ha u SP News Agency, u la iathuh ba u dei na ka shnong Tynger bad u la pyndep ia ka jingpule klass III, u la rung noh ha kane ka kam shipai ha u snem 1956 bad ka thma kaba u dei ban ia leh dei ha Goa ia kaba la tip kum u Portugal ha u snem 1958 hynrei u la don sha shnong ba u wan shuti.
Ha ka thma China 1962, u la ong ba u don ha ka 4th Division bad ha kane ka thma u don ha Tawang mynta ka hap hapoh jong ka jylla Arunachal Pradesh, hangne ki shipai China kila behkrad iaki bad kila ia phet sapra la ka jong ka jong, ha dien ba la ialum lang biang la phah noh sha Ambala kaba dei ka Pynjab ha kato ka por.
Ka thma kaba shisha kaba la sngewthuh ia ka iap ka im dei ka thma Pakistan ha u snem 1965 kaba u la ia don bynta bha ha kane ka por la buh ia u ha 7th Battalion ha Khemkren ha jan Amritsar ha Punjab.
Ha ka thma Bangla 1971 u la dn ha ka 9th Division Nadia District jong ka West Bengal, nangne ki mih poi sha Dhaka ha Jasur bad dei ha Kuna ha kaba ki shipai Pakistan 1000 ngut ki pyndem hynrei ka sorkar India kam shym la ai hukum ban leh ei ei ia ki kila shu ap pahara ia ki shipai ka Pakistan.Na Kuna la wan poi sha Shyllet bad na kane ka jaka sha Shillong, la ong b aula shongthiat na ka kam shipai ha u snem 1976.
u Lieutenant Colonel Bah Martin Khongmen, u la iathuh ha u SP News Agency, u la iathuh ba u la rung ha ka kam shipai ha u snem 1963 bad ka thma kaba u la ioh ban ia shim bynta dei ka thma bangle ha u snem 1971 bad ka jaka kaba u don ha kane ka por thma ka dei Fazilka ha Punjap. Dei ha u snem 1992 ba u don ha 8th Division jong ka Assam Regiment kum u khlieh kane ka kynhun ba u la ioh ia ka hukum ban leh ia ka “Blue Star Operation” ha Punjab.
