New Delhi, K. Lyngkot 15: U Myntri Rangbah Duh ka ri, u Narendra Modi un plié ia ka jingai dawai COVID-19 ha kylleng ka ri ha ka 16 tarik u Kyllalyngkot, 2021 ha ka por 10:30 mynstep lyngba ka video conferencing.
Kane kan dei ka jingai dawai kaba heh tam ha kylleng ka pyrthei ka ban pynlong ha man ki jaka jong ka ri. Yn pyniasoh ia 3006 tylli ki jaka ai dawai ha ki jylla bad ki UT bapher bapher lyngba ka bor internet ha kane ka sngi. Yn ai dawai ia kumba 100 ngut ki briew ha man kine ki jaka ha ka sngi ba nyngkong.
Ia kane ka jingai dawai la buh nongrim ha ki bynta ka imlang sahlang kiba donkam eh ban ioh dawai bad ki nongai jingsumar kiba trei ha ki kam sorkar ne ki kam ba pyniaid da ki briew ne kynhun shimet kaba kynthup ruh ia ki nongtrei ICDS ki ban ioh nyngkong ia une u dawai ha kane ka bynta kaba nyngkong.
Kane ka prokram ai dawai kan pyndonkam ruh ia ka Co-WIN, kaba long ka rynsan internet kaba la shna da ka tnat ka koit ka khiah jong ka Sorkar Pdeng, ka ban ai jingtip mardor shaphang ka jingdon ki dawai, ka jingbuh ia ki ha ka jingkhluit kaba biang bad ka jingithuh ia kito kiba dei ban ioh nyngkong ia u dawai COVID-19. Kane ka rynsan online kan iarap ruh ia kito kiba pyniaid ia kane ka kam.
Ka don ruh ka call centre kaba trei baroh 24 kynta, 7 sngi shi taiew ka ban iarap ia kito kiba donkam ban ioh jingtip ba kham bniah halor ka khlam COVID-19, ka jingpynpoi ia ki dawai bad ka software Co-WIN.
La dep pynpoi ia ki dawai COVISHIELD bad COVAXIN sha baroh ki jaka jong ka ri lyngba ka jingiarap jong ka tnat Civil Aviation jong ka Sorkar Pdeng. Ki sorkar jylla bad UT ha kajuh ka por ki la pynpoi ia kine ki dawai sha man ki distrik. La dep lut ki jingpynkhreh ban sdang ia kane ka prokram ai dawai ha ka nongrim jong ka Jan Bhagidari.
