New Delhi, Nailar 14:U Myntri Rangbahduh ka ri, u Narendra Modi un ïalam ïa ka ri ha ka jingrakhe ïa ka Sngi laitluid ka ri kaba 74, ka ban long ha Red Fort mynta ka sngi. U Myntri Rangbahduh ka ri un pynher ia ka lama ka ri India bad kumjuh un ai jingiakren sha ki paidbah ha kane ka sngi.
Hadien ba u poi ha Lahore Gate of Red Fort haka por 07.18 mystep, u Narendra Modi un shah pdiang sngewbha ha u Myntri ka tnat Iada Ri, u Rajnath Singh ha ryngkat u Defence Secretary, u Dr Ajay Kumar.
Na ka liang u Defence Secretary un pynithuh ïa u General Officer Commanding (GoC), Delhi Area, u Lieutenant Gen Vijay Kumar Mishra sha u Myntri Rangbahduh ka ri. U GoC Delhi Area un ialam ia u Myntri Rangbahduh ka ri sha ka jaka leh burom da ki kynhun shipai bapher bapher ha ryngkat ki pulit.
Hadien kane, u Modi un leit ban peit ia ka jaka ban leh don burom ia u (guard of honour). Kane ka kynhun ka ban leh burom ia u Myntri Rangbahduh ka ri ka kynthup ia uwei u ophisar bad ia ki 24 ngut ki shipai kiba kynthup ia ki shipai liengsuin, ki shipai iada ri, ki shipai duriaw bad ki pulit ka Delhi.
Kane ka kynhun ka ban leh burom kan ieng ha khmat ba don ka lama ka ri India. Mynta u snem, ki shipai iada ri kin pyniaid ia kane ka jingleh don burom bad kane ka kynhun leh burom yn ialam da u Lieutenant Colonel Gaurav S Yewalkar.
Ia ka kynhun shipai iada ri yn ialam da u Major Palvinder Grewal, ia ka kynhun shipai duriaw yn ialam da u Lieutenant Commander K V R Reddy, katba u Squadron Leader Vikas Kumar un ialam ia ka kynhun shipai liengsuin bad ia ka kynhun tnat pulit Delhi yn ialam da u Additional Deputy Commissioner of Police, u Jitender Kumar Meena.
Ia ka Battallion baar jong ka Garhwal Rifles, la seng ha ka 01 tarik u Lber 1901 ha Lansdowne hapoh ka jingialam jong u Lieutenant Colonel JT Evatt. Ka dei kawei na ki kynhun kaba janai tam jong ka kynhun shipai iada ri kaba la noh synniang na ka bynta ban iada ia ka rai mynta la palat shi spah snem. Kane ka battalion ka la jop 11 tylli ki jingiakhun (Eleven Battle Honours) ha ka thma bah ba nyngkong bad ka thma bah ba ar bad kane ka long shisha kaba kyrpang.
Hadien ban laitluid ka ri India, kane ka battalion ka la shim bynta haka thma 1965. Ka la ioh ia ka lad ban iadon bynta hapoh ka Operation Rakshak naduh u snem 1994 haduh 1996 bad hapdeng u snem 2005 bad 2007. Kane ka battalion ka la pynliem ia 80 ngut ki dkhot ki kynhun lehnoh.
Hadien ba khmih ia ka kynhun ba leh burom, u Myntri Rangbahduh ka ri, u Narendra Modi un leit sha ka rynsan ha Red Dort ha kaba yn pdiang burom da u Myntri ka tnat Iada Ri, u Rajnath Singh, u heh duh Defence Staff, u General Bipin Rawat, u heh duh ka tnat shipai iada ri, u M.M. Naravane, u heh duh ka tnat Shipai duriaw, u Admiral Karambir Singh bad u heh ka tnat Shipai Liengsuin, u Chief Marshal R K S Bhadauria. U GoC Delhi area un ialam ia u Myntri Rangbahduh ka ri sha ka rynsan ban pynher ia ka lama ka ri India.
Hadien ba pynher ïa ka lama ka ri India, u Myntri Rangbaduh ka ri un shim ia ka ‘Rashtriya Salute’ ia ka lama ka ri India. Ka kynhun nongtem jong ka Army Grenadiers Regimental Centre kan tem ia jingrwai ieid ri National Anthem ha ka por ba pynher ia ka lama ka ri India bad shim ia ka ‘Rashritya Salute’.
Baroh ki shipai kiba phong uniform kin ieng bad kin salute katba kiwei pat kin hap ban ieng bad ban burom ia ka jingrwai ieid ri. Ia kane ka kynhun nongtem yn ialam da u Subedar Major Abdul Gani.
Ka Major Shweta Pandey kan iarap ia u Myntri Rangbahduh ka ri ban pynher ia ka lama ka ri India. Ha ka por ban pynher ia ka lama ri India kan don ruh ka jingsiat suloi sha suin (21 Gun Salute) da kynhun 2233 Field Battery (Ceremonial). Ia kane ka kynhun yn ialam da u Lieutenant Colonel Jitendra Singh Mehta bad u Gun Position Officer un dei u Naib Subedar (AIG) Anil Chand.
Ka National Flag Guard kaba kynthup ia 32 ngut ki rangbah and uwei u officer na ka kynhun shipai iada ri, kyhun shipai duriaw, kynhun shipai liengsuin bad kynhun pulit ka Delhi kin ia shim bynta ha ka Rashtriya Salute ha ka por ba pynher ia ka lama jong ka Ri India da u Myntri Rangbah ka Ri.
U Major Surya Prakash uba na ka tnat shipai iada ri un ialam ia ka Inter-Services Guard bad Police Guard katba u Lieutenant Commander Vivek Tingloo un ialam ia ka National Flag Guard jong ka tnat shipai duriaw, u Squadron Leader Mayan Abhishek un ialam ia ka tnat shipai liengsuin bad u Additional Deputy Commissioner of Police, u Sudhanshru Dhama un ialam ia ka tnat pulit Delhi.
Ia ka kynhun jong ka Army, kiba la jied ban iashim bynta ha ka National Flag Guard, la jied ia ki shipai jong ka 5th Battalion jong ka First Gorkha Rifles. Ia ka 5th Battalion jong ka First Gorkha Rifles la seng ha u Kyllalyngkot jong u snem 1942 ha Dharamshala bad la pynsangeh noh pat ha u Nohprah 1946. Hynrei la pynkhie im biang ia kane ka kynhun ha ka 1 tarik Kyllalyngkot, 1965 ha Solan (Himachal Pradesh).
Kane ka battalion ka la pynpaw ia jingshlur jong ki shipai jong ka ha ka ‘Operation Cactus Lily’ ha East Pakistan ha u snem 1971 bad ki shipai jong kane ka battalion ki la ioh pdiang burom ia lai tylli ki khusnam Mahavir Chakra bad ar ki Vir Chakra. Kane ka battalion ka la ioh lad ruh ban iashim bynta ha ka mission jong ka United Nations ha Sudan ha ki snem 2008 bad 2009. Kane ka battalion mynta ka shim ia ka kam jong ka Ceremonial Army Guard jong President ka Ri India.
Hadien ka jingpynher ia ka Lama jong ka Ri, u Myntri Rangbahduh kari, u Narendra Modi un ai jingkren ia ka Ri baroh kawei. Ynda la kut ka jingkren jong u Myntri Rangbah, ki kadet jong ka National Cadet Corps kin rwai ia ka National Anthem. La kyrpad ia baroh kiba iadon lang ha kane ka jingrakhe ba kin ia ieng ryngkat bad iarwai lang ia ka jingrwai Ieid Ri. Kumjuh ruh kito kiba ia don lang ha kane ka jingrakhe, kiba don ha ki uniform, kin ym donkam ban salute ha kane ka por.
Ha kane ka jingrakhe, 500 ngut ki kadet ka NCC kiba wan na ki skul bapher bapher, kynthup ki Army, Navy bad Air Force, kin ia shim bynta.
