Shillong, Risaw 30: U Sardar Patel uba dei u khun jong u Ladbai bad Jhaveribhai Patel , u don san ngut shipara bad ki dei na ka long ïing kaba duk kaba na ka shnong Nadiad kaba hap hapoh ka Kaira district, Gujarat. Une u riewkhraw ula dei uwei na ki radbah ban iakhih ban ioh iaka jinglaitluid bad ban long uwei u nongseng ban tehsong ban pynlong iaka India kum kawei ka ri. Ha ka jinglong khynnah u ju iarap ia ki kmie ki kpa da kaba iarap ban puh lyngkha bad ban ri masi. Kumba ju long ki briew sha nongkyndong ka kmie jong u ka ju iathuh iaki khana shaphang Ramayana bad Mahabharata.
Kane ka jingeh kaba u Patel u mad bad iakynduh ka pynlong ba un long kum uwei na ki nongialam kiba khraw. Ka jingiathuh da kaba bun ia ki jingtreikam jong u, dei lyngba ka jingpynlong iaka jingiakhih shah thngan ha Barod bad Kheda ban ioh iaka jinglaitluid na ka jingsynshar ki phareng, kane kala pynlong wat iaka sorkar phareng ba kan pdiang iaka jingdawa ban pynhiar dor iaka jingoh khajna.
U Sardar Patel u la long ym tang kum u nongiakhih ban ioh iaka jinglaitluid hynrei u kum u nongsaindur thymmai iaka ri India. Hadien ka jingioh iaka jinglaitluid, na ka liang ka Pakistan kala pyrshang ban ioh knieh iaka dewlynnong Lakshadweep bad dei da ka jingshlur jong u, ula bthah iaki shipai duriaw (Navy) ba kin leit ban skut biang ia katei ka dewlynnong.
U Patel u dei u briew uba pyni da ki kam kumba long u Gandhi, Nehru, bad u la long u briew uba donkam khamtam ha ka por ba iakhih ban ioh iaka jinglaitluid bad hadien jongka. Bun na ki nongshong shnong kim tip ba kumno ban pynwandur iaka map jongka ri India kumba ka long mynta, lymda dei ki matti jong u, khlem ma u bun ki bynta ba khamheh jongka ri kin shu jah klep khlem da lah ban lum ban lang shuh.
Kawei na ki jaka kaba u Patel ba ym lah ban pyntreikam ia ki mat treikam jong u ka dei ha Kashmir, bad kum ka kuna haduh mynta mynne kane ka jaka ka don hapdeng ka jingiakhih. Lada u dang im bun snem hadien ka jinglaitluid bun na ki jingeh kiba mih khah khah hapoh ka ri khamtam u pud u sam yn lah ban pyndep.
Ka ri India hadien ba ka la ioh iaka jinglaitluid kala mad bad iakynduh ia shibun ki jingeh. Kawei na ki jingeh kaba kum ki nongialam ha kato ka por ka dei halor ka jingeh ban pynbeit ia u pud u sam na ka bynta ka jingdonkam ki nongshong shnong. Ka long ka jingeh kaba khraw ban sdang biang thymmai ia ka ri India kaba la shah pynjot pynpra namar ki don bun ki rai-eh rai-dam, ki jingsngewpher bad kiwei kiwei bad don ruh ki nongpynshit ba ki kwah ba ka ri kan kad ar liang.
Ki jingkylli kiba eh haduh katta katta iaki Nongialam ha kata ka por khamtam ia u Mahatma Gandhi ba hadien kan ioh iaka jinglaitluid la kan jia shisha ne em ba ka ri kan kad arliang hadien ba ka sorkar Bilat kan pyllait noh iaka jingsynshar ne kan don noh da ka ri kaba synshar da ki 565 ki Hima. Ha kata ka por, ka jingkitkhlieh ban saindur iaka ri India kaba thymmai la bynshet ha ki tyrpeng u Sardar Vallabhbhai Patel. U Patel watla u don hapdeng ka jingshitom bad ka rta ka la noh arsut hynrei ula don ka don ka jingiohi jngai kaba kham iar ba kumno ban saindur thymmai ban pynlong kawei ia ka ri India.
Kala don ka jingialang kaba heh bha ha ka 3 tarik u Jylliew bad kila shim ia ka rai ban phiah noh iaka India ha ki ar bynta kata ka India bad Pakistan. Namar ba ka ri India kala pyrthuh bud iaka rukom synshar ka sorkar Bilat bad wat ki 565 tylli ki hima kumjuh. La bthah ba ki Hima kin hap ban jied dalade la ki kwah ban leit sha kano ka ri napdeng kitei ki artylli bad tang khyndiat ki Hima kiba kynthup iaka Travancore, Hyderabad, Junagadh, Bhopal bad Kashmir kim kwah ban don ha ka ri India katba kiba bun kiwei ba kynthup iaka Gwalior, Bikaner, Baroda, Patiala lem bad kiwei ki kwah ban iasnoh bad ka ri India.
U Sardar Patel ula kynthoh, “ba phin nym ioh kum kawei ka ri kaba tehsong lada baroh na ki nongtrei kim shakri hok iaka ri India,” kumta hashuwa ba un pynbeit kumno ban tehsong iaki jylla, ban pynkhlain bad pynskhem iaka synshar kha-dar, ula shaniah skhem ba ki nongtrei jongka sorkar India. Dalade ruh ula trei shitom khlem shongthait ban ioh iaka jingmynjur na ki Hima. Nalor kane, ma u lem bad u VP Menonkila thaw ia ka soskular kaba la tip kumka ‘Standstill Agreements and Instrument of Accession’ kaba buh ki kyndon bad ka ban ailad iaki nongsynshar ba ki lah ruh ban dawa iaki jingpynkylla.
Ka jingkhot ia soi suskular da u Sardar Patel bad VP Menon la lah shisha ban wanrah iaka jingiadei kaba iajan, haba ia nujor bad ka jingkhot jong u Pandit Nehru, ha u nai Jymmang 1947, kaba u la shu pynbna paidbah ba kino kino ki Hima ki bym kwah ban rung hapoh ka Constituent Assembly yn niew iaki kum ki nongshun jong ka ri. Katba ka jingpynbna da u sardar Patel iaki mad treikam ha ka 5 tarikNaitung1947 kams hym la don eiei kata ka jingbyrngem iaki Hima ki bym kwah ban don ha ka ri India.
La pynthikna iaki nongsynshar Hima da ki nongialam ba ka jingthmu ka long ba kin long laitluid hapoh ka ri India ba kin ia shong iasah ryngkat ban ia pyrkhat iaki kam ki jam kum ki paralok ban thaw iaka jingiatehkular. Nalor kane ula pynsynroplang iaki Hima bad ki jaka kiba la shah synshar da ka sorkar bilat.
U Patel ula tip shai bha ba da ka jingsaindur iaka kam sain pyrthei ha kane ka ri kam long kaba biang, bad ka donkam ruh ban tehsong ia ka ri India kaba don bunjait ki riti ki dustur, ka kolshor lem bad kiwei kiwei khamtam eh ha ka rukom im. Ha ka 13 tarik u Naiwieng 1947, u Patel uba long u symbud myntri rangbah ka ri India, u la smai ban tei biang iaka Somnath Temple. Ka Somnath kaba la shah pynjot pynpra ha ki por ba la leit bad la pyrshang ban tei iaka la bunsien, bad kane kala ai mynsiem ia u ba kumno ban tei thymmai iaka India ha ka dur kaba thymmai.
U Patel u la leh ki kam shlur ha ka ban tei pat iaka India baroh kawei ban long kaba khraw, bad na ka liang u Myntri Rangbah ka ri u NarendraModi u la ong ba kane ka dei ka India kaba thymmai. Ki kyntienjong u Patel kaba u la thoh shithi sha ki Nongshynshar hima ki dang sah haduh kine ki sngi bad kin iaisah,”Ngi don ha ka por kaba donkam ban pynsah nam iaka ri India. Da ka jingiasnohktilang, ngin kiew shaphrang ban pynlong iaka ri kaba khraw, bad da ka jingbym iatehsong kan pynjot pynpra iangi khlem poi pyrkhat.
Nga kyrmen ba ki jylla ka ri India kin sngewthuh shai ba lada ngim iatreilang ryngkat ryngkat na ka bynta ka jingmyntoi uba bun, kan pynjot pynpra naduh uba khraw haduh uba rit bad ban ialam pat sha ka jingjot….ai ba kane kan long ka jingsngewsarong ban pynsahnam ba kane ka jingiasngewthuh jingmut kan kyntiew ha ka jinglong mynsiem ba kan long kaba riewspah ha ba ia nujor bad kiwei pat ki ri bad ban phai sha ki kam pyniasuk bad ban long kiba bit ba biang ha ka pahuh pahai.”
Dei tang u Narendra Modi u Myntri Rangbah ka Ri India uba la khyllie ia ki kam ki jam bala trei borbah da u Vallabhai Patel ubaq long u riewkhraw hynrei ym shym la shim bha ia ka nam ban paw pyrthei ha ki jingle jong u. Kumta u Modi ula sdang ban pynmih ia ka jingthrang jong u ban pynpaw ia u Patel naduh ka snem 2003 mynba u dang long kum u Chief Minister ka Gujrat ban ula lah ban pynurlong ha ka por ba u bat ia ka kam Myntri Rangbah ka Ri India. La shna ia u Motdur da ka rnong (Statue) jong u Patel ha ka jingjrong kaba 182 meter u dei uba jrong tam ha ka pyrthei. Ia une u Motdur la shna ha China bad yn kyllie pyrda ha ka 31 tarik u Risaw 2018 da u Prime Minister ka Ri India ha hajan Narmada Dam (Gujarat).
