Shillong, Risaw 07: Ka KSU Laitumkhrah Unit ka la pynpaw ia ka jingbitar halor ka jing leh khlem akor jong u wei u bar Jylla uba la tip kyrteng kum u Amrit Debbarma ia kawei ka samla Khasi ha ka jaka kaba kine ki ia trei lang.
La kynnoh ba utei u Bar Jylla u Ju ring video tuh ia ka man ka por wat haba ka mut ban leit Bar ruh bad u ju byrngem ruh ia ka man ka por ba kam bit ban iathuh hano hano ruh.
Halor katei ka jingleh katei ka samla kala ujor sha ka KSU Laitumkhrah Unit bad mar mar ki dkhot ki la hiar sha ka jaka kaba tei ka samla ka juh trei bylla ban ai jingsneng ia utei u bar Jylla hynrei shwa ba ki dkhot ka seng kin poi utei u bar Jylla u lah dep phet lypa.
Ha ka 6 tarik U Risaw 2021 katei ka Samla ryngkat ka jingsynran lang jong u Samla Sambormi Lyngdoh President bad Brandon Shangpliang General Secretary KSU Laitumkhrah Unit lem bad katto katne ki dkhot na katei ka Unit kala ujor syndon da ka Ejahar ha Laitumkhrah Police Station khnang ba ki bor ka Aiñ kan kem bad pynshitom katba shah ka aiñ.
Na ka Liang ka KSU Laitumkhrah Unit ka la maham jur ia baroh ki bar jylla kiba Trei kiba ktah hapoh ka Shnong Laitumkhrah ba kim bit satia ban leh kano kano ka bym ia hap ne ban long pyrshah ia ka Jaitbynriew khamtam lei ban ñiewpoh ia ki Samla Kynthei Khasi bad lada kum kine kin iai jia ka KSU Laitumkhrah Unit kan ym map satia.
