Shillong, Jylliew 04: U President ka seng kmie ka HYC u bah Roykupar Synrem u la phah da ka shithi sha u Director ka tnad ri mara ka sorkar Meghalaya bad la ai jingtip sha u Superintendent ki pulit ka Ri Bhoi District ia ka jingkit beain ia ki masi da ki kali jong ka “SAFEXPRESS” kaba dei ka kali sam tiar.
Ha ka shithi kaba la phah ba dei ha ka 30/6/2025 katba ki dkhot ka seng ki dang talasi ia ka jingwan rung ki briew kiba khlem kot khlem sla kiba biang sha ka jylla, katba ki dang phah plie ia ka jingkhang ka kali kaba na dien kaba don ia number AS-01-RC-7779, ka kali kaba pyndon kam kit tiar da kawei ka kompeni la lap pynban ba ki don 9 tylli ki masi hapoh ka kali.
Haba ki dkhot jong ka seng kila pan ia ki kot ki sla kiba ia dei bad kane ka jingkit ia ki masi u nongniah ia ka kali ym lah ban ai kano kano ka jingthoh ban pyni ba u lah ban kit ia ki masi na kawei ka jylla sha kawei ka jylla bala ai ha u da ki bor jong ka ain.
Ka seng kala kdew ba ka rukom kit ruh ka long pyrshah ia ka ain kaba la tip kum ka ‘Prevention of Cruelty to Animals Act, 1960, ka Transports of Animals Rule, 1978 kumba la pynkylla ha dien bad ia ka ain Motor Vehicles’ Act, 1988, ka seng ka buh ka jingkylli ia District haduh katno la shah ban kit ia ki masi khlem da bud ia ki kyndon ain.
Ka seng ka dawa ka dei ban pyntrei kam ia ki ain ha kaba ia dei bad ka jingkit ia ki mrad na kawei ka jaka sha kawei ka jylla bad ba dei ban bud ia ki jingbthah baroh kiba la pynmih da ka sorkar na ka por sha ka por.
