Shillong, Nohprah 18: ka Meghalaya Human Rights Commission (MHRC) kaba la khlieh da u Dr.Aftab Hussain Saikia kum u sharman bad Member P.J.P.Hanaman dkhot jong ka kommission mynta ka sngi kala register ejahar pyrshah ia ka sorkar Meghalaya halor ka jingkhlad noh jong ki 13 ngut ki nongtih dewiong ha East Jiantia Hills District kumba la paw ha ki kot khubor ha ka 14 tarik mynta u bnai.
Haba shim na ki jingthoh kiba la mih ha ki kot khubor , la ong ba 13 ngut ki briew kila duh ei iala ka jong ka jingim ha ka jingtih dewiong ha Ksan ha jan ka wah Lyntein kaba don ha Lumthari bad kane ka jingjia kala jia ha ka 13 tarik mynta u bnai bad kane ka thliew dewiong ka jylliew kumba 300 phut.
Ka kyrteng jong kito ki nongbylla tih dewiong kiba la paw ha ki lad khubor kiba la tuh ei ia la ka jingim ki long u,Omar Ali of Magurmari, West Garo Hills; Mezamur Islam of Phesiakandi of Rajabala,West Garo Hills; Mominul Islam Bogidar, Chirang , Assam ; Amir Hussain of Apdaguri, Chirang, Assam;Munirul Islam Bogidar, Chirang , Assam; Saiar Islam of Khoyarsala, Chirang, Assam; Shirapat Ali of Magurmari, West Garo Hills; Mozid SK of Magurmari, West Garo Hills; Raziul Islam of Magurmari, West Garo Hills;Md.Samsul Haque of Bhangnabari, Nalbari Assam; Chal Dkhar; Iong Dkhar bad u Nilam Dkhar na shnong Lumthari, East Jaintia Hills Districts.
Kane ka paw ba ka jingtih beain ia u dewiong ha kane ka jylla Meghalaya wat la ka National Green Tribunal (NGT) kala dep ban khang.Ka MHRC lyngba u Dr.Justice Aftab Hussain Saikia kum u sharman bad u P.J.P.Hanaman dkhot jong ka kommission mynta ka sngi kila ai ia ka jingujor da kaba phah ia ka jingthoh sha u Chief Secretary kajylla ha kaba la hukum ban phah tohkit bad pynpoi ia ka kaiphot sha ka kommission hapoh 30 sngi.
Haba shim na ka jingjia haba ia dei bad ka jingkhlad jong ki briew hapoh krem dewiong ka MHRC kala sngew dei ban ong ba ka sorkar jylla kala dei ban siew ia ka bai lutksan sha kiba ha iing ha sem jong kito kiba iap ha kane ka jingshah ban khyndew hapoh krem dewiong, ia ka hukum ka commission kan sa dang pynmih la ong u bah Aldous Mawlong Secretary ha ka kyrwoh kaba la phah mynta ka sngi.
