Shillong, Jylliew 03: Ki Nongrep jong ka thain Ri-Bhoi ki la ujor bad pyntip bad ujor ha ki nongialam jong ka Hill Farmers Union (HFU) sengkmie halor ka jingot kilo be-ain jong ki nongkhaii ia ki mar rep jongki ha ka thain Ri-Bhoi. Ia kane ki la pynpaw ha ka jingialang kaba la long hynnin ka sngi ha Nongpoh.
Ki nongrep ki la pynsngew ruh ha ki nongialam ban iakren halor ka jingbym ai jingiarap jong ka sorkar ia ki nongrep kiba la shah ktah ha ka jingpynjulor jong ka mariang, halor ka ram ba kim lah siew shuh namar ka jingpynjulor ka bor mariang, ka jinghiardor jong ki mar ki mata bad kumjuh ruh ban iakren b aka sorkar ka dei ban ithuh mar rep noh ia u kwai bad tympew nalor bun kiwei pat ki jingdawa.
Halor ka jingot kilo na ka liang jong u President ka sengkmie u bah Commander Shangpliang u la pyntip ba ka seng ka la pynher la palat 16 tylli ki shithi kata sha u Syiem, CEM KHADC, sha ka tnad Metrology jong ka sorkar jylla, sha u DC bad kumjuh ruh wat haduh u Deputy Chief Minister, u Minister ka rep ka rep ka riang bad kumjuh ruh sha u chief Minister.
Halor ka jingot kilo u la pynpaw ba mynta ym don shuh ki bor kiba ym pat leit iakren hynrei la iakren lut ia baroh, hynrei ym don ba shah shkor namar markhmat bad ki nongkhaii ruh la leit ban iakren, la kem ruh ia katto katne kiba ot be-ain bad u syiem ruh u la pynmih hukum halor kane, hynrei ym don ba patiaw.
Kumta u la ong ka don satang kawei ka lad bad kata ka long ba ki nongrep kin ieng tylli noh kawei bad dei ban pynlong da ka dorbar bah jong ki nongrep bad ban pynlong da ki jingiakhih kiba tyngeh bad baroh ki nongrep ki dei ban iamih tylli.
Halor kiwei pat ki jingeh ba ki nongrep ki la pynpaw u la iathuh b aka seng ka la dep iakren bad ka sorkar. Bad u ong ba kyrmen skhem ba da ka jingiatylli jong ki nongrep ka sorkar kan sa lah ban pynurlong.
U la pyntip ruh ba na ki jingdawa kiba bun kiba ka seng ka la dawa ka sorkar ka la mynjur ban thaw noh ia ka Farmer Commission, ban iathuh noh ia u sohmrit khlaw bad u lasi kum ki mar rep bad u ngeit skhem b aka sorkar kan sa pyntreikam ruh ia kiwei pat ki mat jingdawa kum ha kaba banpynbna ia u snem 2020 kum u snem jong ki nongrep bad kiwei kiwei.
Ha kane ka sngi la ioh ruh i aka jingkren na u General Secretary, bah Allfondbirth Kharsyntiew uba la ban jur halor ka jingdonkam jong ki nongrep ba kin ieng tylli kawei bad u la pynpaw ruh ia ka jingkmen halor ka jingshimkhia jong ki katto katne ki nongialam nongrep jong ka Ribhoi.
U la ong ruh ba ngeitskhem ba nangne shakhamt ki nongrep kin ieng tylli ban iatreilang bad ka HFU n aka bynta ban pynurlong ia kiba bun ki jingdawa ong ki nongrep. U la kyntu ruh ban thaw ia ki unit ha man la ki shnong ha ri Bhoi ba kin iakren ia ki jingeh jongki ha ka thain namar ki nongialam jong ka Central Body kim nym lah ban tip ia ki jingeh lada maki kim pyntip lane sdang ban iakren hi.
Ha kane ka sngi la ioh ruh ban pynskhem ia ki nongkitkam jong ka HFU Pahammawlein 20 Mer unit da u bah Commander Shangpliang president jong ka HFU sengkmie.
