Shillong, Jylliew 01: U Mahesh Kumar Aggarwal, uba dei u Additional Director General (ADG) ka Border Security Force (BSF), Eastern Command, Kolkata, u la wan ban jngoh kaba saw sngi ha Meghalaya Frontier ban bishar bniah ia ka jingpynkhreh treikam bad ki lad jingiada ha shi lynter ka khappud Indo-Bangladesh.
Ha kane ka jingwan jurip u ADG ïa ki katto katne ki Border Outpost (BOP) kiba don ha ki district ka West Jaiñtia Hills bad East Khasi Hills. U la ioh ruh ban ïakren bad ki shipai BSF, da kaba ai khublei ïa ka jingaiti lut bad ka jingshakri kaba dei ban ïaroh hapoh ki jaka bad ki jinglong jingman kiba eh namar ka jingpynthut u slap.
U O.P Upadhyay uba dei u IG BSF Frontier Meghalaya, u la batai ha u ADG ha kaba iadei bad ka jinglong jingman ha khappud, ki kam khaii beaiñ kiba la jia dang shen, ki buit ban pyntreikam, bad ki jingpyrshang ban ïatreilang bad ki bor synshar shnong. U la bishar bniah ïa ki lad ki lynti ba la shim ban ïada na ka jingrung bad jingmih be-aiñ.
Haba kren sha ki ophisar jong ka BSF Frontier Meghalaya, u ADG u la ban jur ïa ka jingdonkam ban pynneh ïa ka jingpeitngor man ka por, bad la pynpaw ruh ia ka bynta kaba kongsan jong ki prokram treikam paidbah ha kaba pynskhem ia ka jingiadei bad ki nongshong shnong ha khappud.
U Aggarwal u la leit ruh ban leit jngoh ïa u Lat ka jylla Meghalaya ha Raj Bhavan, Shillong bad u la pynshai ia u Lat ka jylla halor ka jinglong jingman jong ka jingpahara mynta ha khappud Indo-Bangladesh bad ki sienjam ba shimkhia ba la shim da ki BSF ban iada ia ki jingmyntoi jong ka ri.
