Shillong, Naitung 9: Ka jingsdang ia ka jingrah pateng ia ka sharak Chess Olympiad Torch Relay ka la long na ka I.G. Stadium, New Delhi ha ka 19 tarik u Jylliew 2022 ba la plie da u Myntri Rangbah Duh ka ri, u Narendra Modi bad kane ka sharak kan poi bad sangeh shipor ha Shillong ha ka 9 tarik u Naitung, 2022.
Ka jingai pateng ia ka sharak da u Mitrba Guha, Grand Master sha u kongsan kan long ha Indoor Stadium SAI, STC, NEHU Campus, Mawkynroh, Shillong ha ka 10 tarik u Naitung ha ka por 8:00 baje mynstep.
Lah ban shu kdew hangne ba ia ka bynta kaba 44 jong ka Chess Olympiad la ai da ka World Chess Federation (FIDE) sha ka All India Chess Federation bad kane kan long ha Mahabalipuram, Tamil Nadu naduh ka 28 tarik u Naitung haduh ka 9 tarik u Nailar, 2022.
Ha kane ka bynta, ka FIDE ka la pynlong ia ka Chess Olympiad Torch Relay kaba nyngkong kum ka dak jong kane ka jingialehkai ban long ha India, ka ri kaba la kha ia ka jingialehkai chess.
Yn rah ia kane ka sharak sha baroh ki bynta jong ka ri bad khamtam sha ki 75 tylli ki jaka ba kongsan jong ka ri kum shi bynta ka jingrakhe ia ka “Azadi Ka Amrit Mahotsav”.
Kane ka jingrah pateng ia ka sharak kan poi sha 75 tylli ki nongbah, kum ka dak jong ka Azadi ka Amrit Mahotsav – ka jingdap 75 snem ka jingioh jinglaitluid ka India. Ia kane ka jingrah pateng ia ka sharak la pyllait da u Myntri Rangbah Duh ka India, u Narendra Modi na IG Stadium ha New Delhi ha ka 19 tarik u Jylliew.
U president ka FIDE, Arkady Dvorkovich u la ai ka kane ka sharak sha u Myntri Rangbah Duh, uba la ai pateng pat ia kane sha u nonglehkai chess uba la pawnam bha, u Viswanathan Anand.
Hadien kane, ka sharak ka la poi sha ki jaka bapher bapher jong ka ri kum ka Red Fort ha ka nongbah jong ka ri, ka Attari Border ha Amritsar, ka Taj Mahal ha Agra bad ka Vidhan Sabha ha Lucknow, ryngkat kiwei kiwei ki jaka.
Kane ka dei ka sien kaba nyngkong ha kane ka jingialehkai ba yn pynlong ia ka bynta kaba 44 jong ka FIDE Chess Olympiad ha India kaba long ruh ka ri kaba nyngkong ban sdang ia kane ka jingrah pateng ia ka sharak ia kaba la sdang da ka FIDE ha kane ka sien kaba nyngkong naduh ba la sdang pynlong ia kane ka jingialehkai ha u snem 1927.
Namar ka jingialehkai kan long ha India, ka ri kan phah 20 ngut ki nongialehkai – kaba long ka kynhun nongialehkai kaba heh tam – ban iashim bynta ha kane ka lympung ialehkai. Ka India ka don hok ba phah mar ar kynhun na ka bynta ka thup Open bad ka thup jong ki nongialehkai kynthei.
Yn wan iashim bynta kumba 2000 ngut ki nongialehkai na 188 tylli ki ri, kaba long kaba bun tam ha ka histori jong ka Chess Olympiad. Ka bynta kaba 44 jong ka FIDE Chess Olympiad kan long ha Chennai naduh ka 28 tarik u Naitung haduh ka 10 tarik u Nailar, 2022.
