Shillong, Nohprah 21: Ka ICAR Umiam kala pynlong ia ka jingai jinghikai ia ki nongrep,ha kaba 110 ngut na ki 47 tylli ki shnong kila wan ban ia shim bynta ha kane ka jinghikai, ia kaba la plie da u MLA jong ka Nongbah u bah Mayralborn Syiem, ha ka jingkren jong u la ai ka jingiaroh ia ka KVK-Ri Bhoi kaba la lah ban pynlong ia kane ka jinghikai na ka bynta ban pynkiew ia ka ioh ka kot jong ki nongrep.
Ha ka jingkren jong u District Agriculture Ophisar jong ka Ri Bhoi District u bah W H Pakyntien, u la kyntu ia ki nongrep ba kin leit mih sha ophis jong ka tnad rep bad kim shim ia ki jingiarap kaba dei ban ioh ha ka dor kaba bit. U Bah G Shylla District Horticulture Officer, Ri Bhoi, u la ban jur ba ia ki mar rep dei ban don ka “insurance” na ka bynta ki marrep ban iada ia kaei kaba ym tip lypa na ka jingjia ka mariang.
U Director, jong ka ICAR Research Complex ba dei peit ia ka for NEH Region, Umiam, u Dr. Narendra Prakash, u la ong ba ka KVK ka dei ban trei shitom na ka bynta ban iarap ia ki nongrep ban pynkiew ha ka ioh ka kot ka jong ki. U la ong ba kane ka jingiashim bynta jong kiwei ki tnad kiba ia dei bad ka rep ka long kaba kongsan. Ia ka jingialang la kren pdiang da u Dr M Mokidul Islam. Ha kane ka sngi la sam ruh ia ki symbai jhur sha ki nongrep.
