Shillong,Lber 26:Ka dorbar mang tyngka kaba lai sngi jong ka KHADC la sdang mynta ka sngi bad kan kut ha ka sngi thohdieng.U Executive Member ba dei khmih ia ka tnad pla pisa u bah Seiborlang Warbah u la wanrah ia ka mang tyngka kaba tang lai bnai ha kane ka snem mang tyngka 2025-26.
Haba kren hapoh ka iing dorbar u bah Seiborlang u la ong ka Executive Committee kaba rim kala kut noh hadien bala ioh ia ka election kaba thymmai,na ka liang ka EC ka tip ba u snem mang tyngka 2024-2025 kan sa kut noh ha ka 31/Lber/2025 kumta na ka liang ka EC kam pat lah ban wanrah ia ka mang tyngka kaba pura jong u snem 2025-2026.
U EM ba dei peit ia ka tnad pla pisa u la ong kane ka mang tyngka kaba la wanrah mynta ka sngi ka long na ka bynta lai bnai ka ban sdang 1/Iaiong/2025 bad kan kut 30/Jylliew/2025 na ka bynta kine ki lai bnai ka jingmang pisa kan long T.35,44.55,600/- tyngka,ia ka mang tyngka kaba pura kan sa long biang ha u bnai jylliew.
Ia kane ka jingmang tyngka la phiah ha ki khyndai tylli ki tnad trei kam, la mang T. 8,52,29,550/-tyngka sha ka General Administration Department,Law Department T.17,65,910/- tyngka,Revenue Budget bad Finance Department T.2,65,38,350/- tyngka.
Ia ka Forest Department T. 2,57,05,470/- tyngka, ia ka tnad Administration of Justice bad Judicial Department T. 1,70,52,930/- tyngka,Legislative Department T. 2,27,65,040/- tyngka, Education Department T.3,87,640/- tyngka,Civil Work bad Development Department T. 15,82,93,940/- tyngka,Enforcement Scheme for Protection of Tribal Land bad Interest Department T. 1,67,16,770/-tyngka.
Na kane ka mang tyngka kaba kaba la wanrah mynta ka sngi kaba bun eh ka leit na ka bynta ban siew ia ka tulop jong ki MDC bad ki nongtrei jong ka KHADC.Ha ka grant kaba saw kaba dei ban maramot ia ki jaka sah jong ka tnad khlaw,ban thung dieng biang na ki skhim thymmai ha kane ka bynta ym shym la mang pisa .
