Shillong, Lber 26: Ka Executive jong ka Khasi Hills Autonomous District Council kala pynpaw ba kumba long mynta kam shym pat la don ka jingthmu ban buh ia ka Branch Office jong ka Council ha Mairang kaba hap ha Eastern West Khasi Hills.
Ia kane la pyntip da u Bah Pynkhrawboklin Kharjahrin uba dei u Executive Member jong ka KHADC ba peit ia ka tnad Council Development ha ka sngi sdang jong ka Dorbar Mang tyngka.
Haba buh jingkylli bynrap u MDC ka Mairang u Bah Equator L Nongrang u la pynpaw ba ka EC ka barim kala don iaka jingthmu ban buh ia ka branch office ha Mairang, hynrei haba jubab u EM u la ong ba ka EC kan sa shong bishar haba kadei bad ka jingthmu ban tei Branch office jong ka Council ha Mairang kaba hap ha Eastern West Khasi Hills.
Ia katei la pyntip da u Executive Member (EM) ba khmih ia ka tnad Council Development, u Bah Pynkhrawboklin Kharjahrin, haba jubab iaka jingkylli bala wanrah da u MDC ka Mairang u Bah EL Nongrang ha ka Dorbar Mang Tyngka kaba la sdang hynne ka sngi Balang.
U Bah Pynkhrawboklin ula ong “Ia kaba mynta ka EC kam pat don jingthmu ban tei ia ka Branch Office ha Mairang hynrei ka EC kan sa shong jingialang halor kane ka mat”.
Ula iathuh ba ha ki snem bala dep, kala don ka jingleit jurip ia ka jaka bad kala don ruh ka jingiakren hynrei haduh mynta kam pat don satia kano kano ka jingiateh ban tei ia ka Branch Office.
Halr kane u MDC ka Mairang u la kyntu ia u EM ba peit ia kane ka tnad ba un buddien kumba leh lem ha kiwei ki district ban buh iaki branch office. Haba bynrap jubab u Chief Executive Member u Bah Shemborlang Rynjah u la ong ba ka long kaba donkam ban don ia ki shnat trei kam jong ka council ha man la ki district bad ka EC kan sa shim khia halor kane ka bynta.
