Shillong, Naiwieng 7: Ka Deputy Commissioner, South West Khasi Hills District,Mawkyrwat ka kong R.Lyngdoh IAS, kala pyntip paidbah baha ka jingialang kaba la long haka 6 tarik u Naiwieng, 2013 bad ki Myntri shnong, ki Nongmihkhmat naki seng bapher bapher ryngkat bad ki heh pulit ka District kila rai ban pyllait noh ia ki bus ban iaid lyngba na ka jingkieng Wah Umngi (Photumbah) naduh ka 11 tarik Naiwieng, 2013.
Ka Deputy Commissioner kala pynpaw ba ka jingpyllait ia ki Bus ban iaid lyngba katei ka jingkieng kan long katkum kine ki kyndon ba Ka por ban pyllait ia ki bus kan long naduh 6 baje mynstep haduh 11 baje mynstep bad naduh 2 baje janmiet haduh 8 baje mynmiet.
Ka kong Lyngdoh kala iathuh ruh ba ki bus ki ban shah ban iaid lyngba na katei ka jingkieng kim dei ban kit palat ia ka 9 (khyndai) ton. Ki nong shong bus kin hap ban hiar naka Bus, shwa ba ka bus kan iaid lyngba na katei ka jingkieng.
Shuh shuh ka kong Lyngdoh kala pynpaw ruh ba kiwei kiwei ki bus kiba la shah shim wai bad ki ban wan sha katei ka thain ban iaid lyngba katei ka jingkieng kin hap ban pyntip shwa iaka jingwan jongki sha ka Mawkyrwat Area Bus Association lada ki thmu ne kwah ban iaid lyngba ka jingkieng Wah Umngi. Kane ka hukum kan treikam mardor tad haduh ban da pynbna da kumwei pat.(SP News)
