SHILLONG: Ka jingpynkhreh ia ka Dorbar Ri kaba kyrpang, kaba saw ka la sdang ha ka 12 tarik January 2013, ha Mairang, ha office Syiem Hima Nongkhlaw, ha kaba la don lang ki Sordar Shnong, jong ka Mairang Pyllun, kiba la poi sha ka jingialang ba la khot da u Paiem Phrester Manik Syiemlieh, Syiem Hima Nongkhlaw, & Vice-President, Federation of Khasi States ha ka jingiadon lang ki Myntri, ki Lyngdoh, ki Sordar, ki dkhot jong ka Consultative Executive Dorbar jong ka Hima Nongkhlaw, ha ryngkat ka jingdon lang u Bah John F Kharshiing, Co-Chairman, MIDC, Govt of Meghalaya, Chairman, Grand Council of Chiefs of Meghalaya, & Spokesperson, Federation of Khasi States bad u Bah Harlinjai Skhemlon, Sirdar Hima Mawdon, & Secretary, Federation of Khasi States.
Katei ka jingialang ka la pdiang sngewbha ban shim khia ban pynkhreh ba ka Dorbar Ri kaba Kyrpang 13 February 2013 ba kan long kaba rah ia ka burom bad ka nam jong ka jaidbyriew baroh kawei bad khamtam jong ka Hima Khadsawphra /Nongkhlaw. Ka jingialang ba la pyniaid da u Syiem Nongkhlaw, ki la rai ban ia kynduh kyrkieh biang ha ka 14 tarik January 2013, hapoh Office Syiem Nongkhlaw ban thung ia ki Committee treikam bapher bapher kum shibynta ban pynkhreh ia ki kam kiba iadei ha kaban pynkhreh ia ka Dorbar Ri kaba Kyrpang bad kaba Saw.
Ka Dorbar Syiem Nongkhlaw, ka la rai ruh ban lum ia ka jingialang jong baroh ki Sordar jong ka Hima Nongkhlaw ha ka 21 tarik January 2013, ban ia kren halor ka jingpynkhreh ia ka Dorbar Ri kaba Kyrpang bad kaba Saw. Ka Dorbar ka la rai ban khot sngewbha ruh ia baroh ki seng sain pyrthei (National bad State Political parties) bad ban ailad ia uwei na kawei ka seng ban pynsngew bad kren lyngkot da ka jingthoh, ia ka nongrim jong ki ha kaba iadei bad ka jingdawa jong ka Dorbar Ri.
Nalor kitei la rai ban khot sngewbha kum ki invitees ia baroh ki long heh jong ka Sorkar India, Sorkar Meghalaya, kynthup ia ki Chief Executive Members jong Khasi, Jaintia bad Garo Hills ( lai tylli ki Autonomous District Councils). La kyntu jur ia baroh ki Syiem, Sirdar, Lyngdoh, Wahadadar, ki Myntri, ki Dorbar Kur, ki Rangbah Shnong, Sordar Shnong, ki Seng Samla, Seng Longkmie, ki Seng Bhalang, ban pynkhreh lypa ia ka kyrteng jong ki nongwan dorbar bad ban ai ha ka sngi long Dorbar Ri ha ka 13 Feb 2013, kum shibynta ban ioh lad ban pynmih ha ki snem ban wan ia ka kot sah kynmaw ia baroh ki nongwan shim bynta ha ka Dorbar Ri.
Na ka liang u Bah John F Kharshiing, Chairman, Grand Council of Chiefs of Meghalaya, & Spokesperson, Federation of Khasi States, ha kaba kren hakhmat kane ka Dorbar Syiem bad ki Sordar pyllun jong ka Mairang Area u la ai khublei kyrpang ia ka U Paiem Phrester Manik Syiemlieh, bad ka Dorbar Syiem Hima Nongkhlaw kiba la pdiang ban lum bad ban khot ia ka Dorbar Ri kaba kyrpang bad kaba saw.
U Bah John F Kharshiing, u la ong ba ka long kaba donkam bha kum ha kane ka por ban lum ia ka Dorbar Ri ban bteng ia ki rai jong ka Dorbar Ri kaba nongkong 14 Jan 2004, kaba ar 6 October 2007 bad kaba lai 14 November 2011.
U la ong ba ka long kaba donkam ban pynsngew hakhmat ka Dorbar Ri kaba Kyrpang bad kaba Saw( Special Peoples Parliament) bad ki khun ki hajar ia u soh bad ka jingjop jong ka jinglum Dorbar Ri lai sien ha kaba ka long ka sien kaba nyngkong hadien 64 snem ha kaba ka bor jong ka Constitution Ri India katkum ka Article 338 ka National Commission for Schedule Tribes(NCST) kaba la ai ia ka rai bishar kaba pynksan ia ki dulir Instrument of Accession and Annexed Agreement 17 August 1948, ha ka 26 April 2012, kaba la bthah (direct) ia ka tnad Union Ministry for Tribal Affairs, Sorkar India ban leh ia kaba donkam ban pyndep ia kitei ki jingkular kiba la mynjur da ka Sorkar India bad ki Hima Khasi States.
Nalor katei la don ruh ki kam kiba la nang mih kiba long kiba pynksan ia ki jingialeh bad ka jingdawa jong ka Dorbar Ri. U la ong ba ka Dorbar ka la buddien ia ki kam da kaba ia kynduh ia ki heh Sorkar India, bad u ong ba ki jingiakynduh ki la long kiba ai jingkyrmen ia ka jingurlong ki jingdawa jong ki Khlieh Nongsynshar ha kaba kin ioh ia ka Schedule bad ka Council kaba kyrpang katkum ki kyndon ka Instrument of Accession and Annexed Agreement 17 August 1948.
U la ong ruh ba ka long kaba donkam kyrkieh ban ioh jingshai bad jingiada na ki Ain kiba mih na ka Parliament kiba sdang ban iuhroit ia ki hok jong ka Ri bad ka jaidbynriew khamtam ha kaba iadei bad ka khyndew ka shiap, ki khlaw ki btap, ki lum ki wah, bad ki rukom thaw ain. Ha kane ka Dorbar Nongkhlaw u Bah John F Kharshiing, Chairman, Ka Dorbar Ki Khlieh Nongsynshar Ka Ri Hynniewtrep, u la pyntip ba ka Dorbar ka la pynkhreh ia ki jingialang bapher bapher kum ka jingpynkhreh ia ka Dorbar Ri bad u la ong ba ka Dorbar ki Nongsynshar kynthup ki Rangbah na ki Shnong, ka thain Mawphlang, Nongspung, Lyngiong, Nonglwai, Sohiong, Marbisu, Pansanngut, bad kiwei kiwei kan long 10 baje mynstep ha ka 15 tarik January 2013 hapoh Iew Market Complex Mawngap.
Ki Hima ka thain Sohra, Shella, Sohbar, Mawlong, Satsohpen, Laitkyngkot, bad kiwei kin ia kynduh lang ha ka por 11 baje mynstep ha ka 19 tarik January, 2013 ha office Syiem Sohra; Ki Sordar bad ki Rangbah ka Hima Nongkhlaw baroh kin ia kynduh ha ka por 10 baje myntep ha 21 tarik January 2013, ha Mairang, Office Syiem Nongkhlaw.
Katba ki Sordar bad ki Rangbah, ki Hima Nongstoin, Rambrai, Nobosohphoh, Mariaw, Mawiang, Jyrngam, Nonglang, Riangsih, bad kiwei kan long por 11 baje mynstep 22 tarik January 2013 ha Office Syiem Nongstoin, ki Khadphra(18) Elaka Dolloi bad Sirdar sha Ri Lum Jaintia Hills kin ia kynduh lang ha ka por 11 baje mynstep ha ka 25 tarik January 2013, ha Hall Trep Pale Locality, Jowai.
La kyrpad jur ia bador ban shim khia ban por ban ioh ka jingpynshai ha kaba iadei bad ka jingdonkam ban poi ryntih lang baroh sha ka Dorbar Ri ha Mairang ha ka 13 February 2013 naduh por 10 baje mynstep. U la pyntip ba ha kine ki khydiat sngi yn dang bteng ki jingpynbna sha kiwei ki Hima / Elaka.
Jingstad ngi wad sawdong pyrthei – jingshai ka Ri ngim tip ei ei
