Shillong, K’Lyngkot 11: Ka jingiakynad na bynta ban ioh bun ki vote ha ka Jylla Meghalaya ka la sdang mynta ka sngi hadien ka jingpynbna jong ka Election Commission jong ka Ri India ha ka sngi Thohdieng.
Kumba 14,90,015 ngut ki nongthep vote kin sa leit sha ki 2,485 polling stations jong ki 60 konstitwensi kiba dang shu dep phiah ban jied ia la ki jong ki nongmih khmat jong ka ingdorbar thawain ha ka 23 tarik u Rymphang bad ka jingkheiñ ia ki vote kan long ha ka 28 Rymphang.
Ka tarik ba khatduh ban phail ia ki nomination la buh ha ka 6 tarik u Rymphang bad ban bishar ia ki nomination kan long ha ka sngi ba bud.
Ka tarik ba khatduh ba ki kyrtong kin weng ia ki kyrteng lade kan long ha ka 9 tarik u Rymphang. Ki kam ban pyniaid ia ki ilekshon kadei ban kut ha ka 3 tarik u March namar ka por jong ka ingdorbar thawain ba mynta kan kut hapoh ka 10 tarik u bnai Lber.
Ha kane ka ilekshon mynta kin bun ki kynthei ha kaba ki don haduh (7,53,307) lada ia nujor bad ki shynrang bad ka Mawlai konstitwensi kaba don ha East Khasi Hills ka don ia ba bun duh ki nongthep vote (33,869) bad ka Dalu ha West Garo Hills kadei kaba duna duh ia ki nongthep vote (15,979).
U ophisar ba hajrong duh jong ka Ilekshon commission uba bat kum u Chief Election Officer (CEO) U Prashant Naik u la pyntip ba kumba 9,940 ki ophisar ilekshon yn buh ha ki 2,485 ki polling stations.
Ka Jylla kaba la don lypa ki 22 tylli ki company jong ka central paramilitary forces, ka la pan biang haduh 76 tylli ki company ban phah ha ki jaka kiba don ki lehnoh ha Garo hills bad ha ki katto ki jaka kiba la suba ba lah ban don ki kam huri hura ha katei ka por.
U Naik u la ong ban ialeh ia ka jingtuid ki pisa ha kane ka ilekshon ngi donkam ia ka jingiatreilang na baroh ki liang ban pynshisha ba ka jingtrei borbah ka pisa kan nym don da lei lei ha kane ka ilekshon.
Haba iadei bad ki lehnoh, u Naik u la ong ba u don ka jingkyrmen ba ki seng lehnoh ki nym boycott ia ka ilekshon.
Shuh shuh u Naik u la pyntip ba ka ilekshon commission hapoh ka Jylla kan pynlut haduh 15 klur tyngka.
