Shillong, Risaw 02: U myntri rangbah ka jylla u Dr Mukul Sangma u la ong ba ka iing bihsar Meghalaya High Court ka la ai ia ka jingmynjur ban buh ia ka iing bishar kaba kyrpang na ka bynta ban tian bihsar ia kito baroh kiba la shah kem ha kine ki jingiakhih Inner Line Permit (ILP).
U myntri rangbah u la ong bay n don ba lait na ka kti jong ka ain la u dei u nongmihkhmat, seng bhalang, ne u riew shimet ka ain ka don bad baroh ki dei ban kohnguh ia ka ain.
La btah ia baroh ki Deputy Commissioner ba kin lum ia ka jingkhein ha kaba ia dei bad ka jingjulor na kane ka jingiakhih bad ynda la bihsar bad lada ka dei shishah ba ki jingjulor ka dei na ki nongiakhih, kito kiba khot ia ka jingiakhih ki hap ban siew ia ka jinglut.
U myntri rangbah u la ong ba ka dei ka kamram jong ka sorkar ba hap ban leh lada ka sorkar kam leh, ka long pyrshah ia ka rai jong ka iing bihsar. Ka sorkar kan leh ia ka kam kaba dei ban leh katkum ki riti synshar kiba la pynkup ha kaka.
Halor ka jingkynnoh ia u ba u dei u “Dictator” na ka liang jong u myntri rangbah u la ong ba kampher bad yn nym sngewpher ia kane ka jingkynnoh, ka dei ka kamram jong ka sorkar ban leh.
Na ka liang jong u myntri rangbah u la kren shai kdar ba ka sorkar kan iaid sha khmat ban teh la kam ia ka jingwan tuid jong ki briew kiba na bar khlem da pyntrei kam ia la ILP ha kane ka jylla. Ka sorkar kam kwah ban shu bynshet ia kane ka kam ha ka sorkar pdeng. (SP News)
