Nongpoh Kyllalyngkot 26: Kum shibynta na ka jingpyn ialehkai Free Demo-cum Coaching Camp ha ka jingialehkai martial arts kaba la tip kum ka judo, ka Directorate of Sports & Youth Affairs ryngkat bad ka jingiatreilang bad Ka Meghalaya Judo Association ka la pynbeit ban don kum kine ki camp ha baroh 10 tylli ki district lait noh ka East Khasi Hills, Shillong.
Na ka bynta kane U District Sports Officer Ri Bhoi District Nongpoh u khot bad wer ia kito ki khynnah samla kiba hapoh 16 snem karta kiba kwah ban ioh jinghikai bad ban tip shaphang ka jingialehkai judo ka ban sdang ha ka 20 tarik Lber (Feb) 2014 ha NSCA Indoor Stadium Nongpoh ban wan ai kyrteng ha ki por ba long trei ha ka ophis U District Sports Officer Nongpoh ha lane shwa ka 5 tarik Rymphang (Feb) 2014.
Ka jingialehkai Judo ka dei tang ma ka na ki martial arts ba la pynialehkai ha Olympic naduh u snem 1964 bad 1984 na ka bynta ki shynrang bad kynthei ruh kumjuh. Kane ka jingialehkai Judo la sdang da U Dr Jigoro Kano na Japan. Ki khynnah kiba kwah ban shah hikai ki lah ruh ban phone ha kine ki number 9863943125 & 9863060576 jong ka Meghalaya Judo Association (MJA) lane email sha meghalayajudo@gmail.com.
Hadien ba la dep kitei ki camp baroh ki 10 district katkum ka jingkwah ka Sorkar Meghalaya, yn sa pynlong pat sa ia Ka State Level Judo Championship 2014 ha Shillong ha u bnai Iaiong 2014. Na ka bynta kiwei pat ki district ba dang sah, lah ban dang ai kyrteng lypa lyngba ka MJA. Kane ruh ka long kum kawei pat ka jingpynkhreh na ka bynta Ka Junior National Judo Championship 2014 ka ban long hi ha Shillong. Ha ka jingialeh Lusofonia Games Goa 2014, ka India ka la ioh mar tylli ki takma ksiar bad rupa bad 4 tylli ki takma rnong ha Goa lyngba Kalpana Devi Thoudam, Avtar Singh, Pramod Kumar, Garima Choudhary, Snusha Gawas, Manjeet Nandal, Rajni Bala bad Shivkaran Kenat.(SP News)
