Guwahati July 08: Da ka jingthmu ban iada ia lade, khamtam eh ia ki kynthei ha kane ka juk kaba mynta ka seng trei mon sngewbha kaba la tip kum ka Nari Artha Samajai Samity (NASS) ka la ai ka jinghikai kyrpang ia ki kynthei kiba wan na ki long iing kiba duk ha ka liang jong ka Martial Art.
Ka jingthmu jong kane ka seng ban ai ia kane ka jinghikai ei kumno ban iada ia lade ka long ban pynlong ia ki kynthei ba kin lah ban iada ia lade haba poi ha kano kano ka jingeh khlem da don kam ba ap ia ka jingiarap jong kiwei.
Ka Dipali Barman secretary jong ka NASS, kala ong ba, kum ki kynthei katba ki dang don ha iing ki heh ki san hapoh ka jingiada jong u kpa bad ynda ki la shong kurim kiheh ki san hapoh ka jingiada jong u tang jong ki bad ynda ki la tynmen pat ki hap ban shaniah ha ka jingida jong ki khun.
Ka NASS ka la sdang ia kane ka jingai jinghikai kaba kyrpang ia ki kynthei ha u bnai Lber mynta u snem bad kane ka jinghikai kan neh naka bynta hynriew bnai. U nonghikai ia kane ka Martial Art u Rana Sinha u la ong ba u iohi ba ki kynthei ki long shisha kiba la khreh ia kane ka jinghikai bad ki kloi ban but ia ki rukom hikai kiba ha rukom.
Ia kane ka jingai jinghikai la shim tang ia ki khynnah kiba san snemshaneng bad 18 snem sha poh. Ha kaba sdang bun na ki kynthei ki leh rain ban wan sha khmat hynrei mynta ki la iohi iaki paralok jong ki bad mynta ki la poi haduh 85 ngut kiba la wan ban iashim bynta.
Bun na ki kynthei kiba la leit ban ia shimbynta ha kane ka jinghikai kaba kyrpang ia ki kynthei ki la pynpaw ba ki leit ban shah hikai ka long na ka bynta ban iada ia lane ha kane ka juk kaba mynta ki kynthei ki shah kren shait ha ki shynrang bad ki juh ktah kti, da kane ka jinghikai kilah ban iada ia lade.(SP News)
