Nongpoh, jymmang 12:Ka seng samla pule ka Khasi student Union(KSU) jong ka North Khasi Hill District Mynta ka sngi ka la leit ban iarap ia ki lanot kiba la sha lynshop ha ka mariang ha ka shnong Sohpdok kaba hap hapoh jong ka Mawhati konstitwensi.
Na ka liang ka KSU, NKHD hapoh ka jingialam jong u Samla Vincent Makri, General Secretary, u Samla Augustar Nongbri, Finance Secretary, Samla Raymond Jana, Secretary ka KSU, Umsning Circle lem bad ki dkhot na ka Umsning Circle mynta ka janmiet ki la leit hiar sha katei ka shnong Sohpdok bad leit ban kner ia ki jingiarap sha ki lanot eriong da ki tin soping bad u khaw ha kaba ki la aiti noh ia kine ki synñiang ha u Rangbah Shnong ka Sohpdok u Bah Rocky Nongkhlaw ha ka jingsakhilang ruh da ki riew rangbah na kane ka shnong.
Haba kren ha ka jingialang hadien ba la dep ban aiti noh ia u synñiang sha u Rangbah Shnong, u Samla Makri kum u nongialam sengbhalang u la pynpaw ba ka seng hi ka dap da ka jingsngewkhia halor kane ka jingjia kaba la jia khlem poi pyrkhat haba da ki phew tylli ki ing ki la shah ktah, ka seng hi ka pynpaw ruh ia ka jingsngewlem sha kitei ki lanot kiba la mad ia kum kane ka apot shah lyngshop ha ki bor jong ka mariang bad na ka liang ka seng ka kitbok kitrwiang ruh ba kin nang lah pat ban khie biang ban ioh ia la ka ing ka sem bad ruh ka kamai ka kajih kaba janai khnang ba kin nang lah ban im ia ka jingim kaba man ka sngi.
“Ka Seng ka la shim ia kane ka sienjam ban kner ia ki kti jingiarap sha kane ka shnong ka dei halor ka jingsngewkhia na ka bynta kitei ki lanot khamtam kito kiba duk kiba rangli bad kiba dei na ki shnong nongkyndong, ka seng hi hashwa ba kan wan ban noh synñiang sha kane ka shnong ka leit ruh ban kynduh ia ka Deputy Commissioner jong ka district na ka bynta ban kyrpad ia ki bor ba dei peit ia ka distrik hi baroh kawei ba kan lah ban pynkloi ban phah ia ki lad jingiarap sha kum kine ki lanot kiba hap ban mad ia ka apot shah lynshop ha ki bor jong ka mei mariang”, ong u Samla Makri
U la ong ruh, ba watla ka seng kam don lad than ban peit ia baroh ki jingdonkam kiba kyrkieh jong baroh kito ki paidbah kiba la shah ktah ha kane ka jinglynshop eriong kaba dang shu jia shen, hynrei kum ka seng hi ka la pyrshang pat ban thaw lad thaw lynti kumno ban iohlad pat ban kner ia ki synñiang sha kito ki paradoh ki parasnam kiba la mad ia kum kane ka apot, ka seng ka la kitbok kitrwiang ruh ia baroh ki paidb ah nongshong shnong ba kin koit kin khiah bad kin khie im biang ha ka kam ka jam jong ki kumba ki ju long man la ka por, bynrap u Samla Makri.
Na ka liang u Rangbah Shnong ka Sohpdok, u Bah Nongkhlaw haba pdiang sngewbha ia kine ki synñiang kiba kum ka shnong hi ka la iohpdiang na ka seng KSU, NKHD, u la pynpaw ia ka jingkmen kaba khraw halor kane ka sienjam kaba bha tam jong kane ka seng ha kaba ka la lah ban wan noh ia ki jingiarap kiba donkam tam kita kum ka tin soping bad u khaw bam kiba kum ki paidbah hi kin iai pyrto junom ia kane ka jinglah kloi jong ka KSU ban kner ia ki kti jingiarap sha kane ka shnong.
Kum u nongialam shnong, u la kitbok kitrwiang ruh ia baroh ki nongialam bad ki nongkitkam jong ka KSU ba kin nang ioh shisha ia ka met kaba koit kaba khiah bad ruh ba kin nang lah shisha ban poi sha ka thong ha kaban kin nang kiew na kawei ka por sha kawei pat ha ka jingshakri ia u paidbah baroh jong ka distrik bad ruh jong ka jylla khnang ban pynim pat ia ka Ri bad ka Jaidbynriew hi baroh kawei.(SP News)
